Çexiya mətbuatında Dağlıq Qarabağ münaqişəsinə aid üç məqalə dərc edilib

Azərbaycan, Bakı, 23 iyun /Trend/

Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının xarici ölkə QHT-ləri üçün elan etdiyi qrant müsabiqəsinin qaliblərindən biri olan Çexiyanın "Təhsil və Tolerantlığın Təşviqi Mərkəzi" həyata keçirdiyi "Azərbaycan mirvarisini kəşf edək" layihəsi çərçivəsində tədbirlərini davam etdirir.

Şuranın mətbuat xidmətindən Trend-ə verilən məlumata görə, sürətlə inkişaf edən Azərbaycanı müasir Avropanın ayrılmaz hissəsi kimi Çexiya ictimaiyyətinə təqdim edən "Təhsil və Tolerantlığın Təşviqi Mərkəzi" ölkəmizin dövlət müstəqilliyinin ilk illərindən üzləşdiyi Dağlıq Qarabağ münaqişəsinə xüsusi yer ayırır. Belə ki, Mərkəzin ekspertləri Çexiyanın nüfuzlu informasiya portallarından biri olan www.lidovy.cz saytında "Dağlıq Qarabağ: təcavüzkar Ermənistan cəzasız qalıb" adlı məqalədə münaqişənin səbəb və nəticələrinə toxunaraq, onun konkret olaraq Azərbaycana və bütövlükdə regional əməkdaşlığa necə böyük ziyan vurduğunu, eləcə də təcavüzkar Ermənistanın ayrı-ayrı supergüclər tərəfindən ədalətsizcəsinə dəstəkləndiyini açıqlayıblar. Məqalədə qeyd edilir ki, münaqişənin həllinin onilliklər boyu uzadılması ATƏT-in sülhyaratma institutlarının qeyri-effektiv fəaliyyətinin nəticəsi kimi qiymətləndirilməlidir.

Mərkəz ekspertlərinin digər bir internet resursu www.denik saytında dərc etdikləri "Moskva Dağlıq Qarabağ münaqişəsinin həllinə necə mane olur" adlı məqalədə böyük insan tələfatlarına və dağıntılara səbəb olmuş bu münaqişədə keçmiş imperiya mərkəzinin oynadığı rol yetərincə işıqlandırılır. Məqalədə qeyd edilir ki, Azərbaycan tərəfinin sülhpərvər addımlarına baxmayaraq, münaqişə daimi gərginlik ocağı kimi kənardan idarə edilir və atəşkəs rejimində də hərbçilərin və cəbhəyanı bölgələrdə yaşayan vətəndaşların öldürülməsi davam edir.

"Təhsil və Tolerantlığın Təşviqi Mərkəzi"nin ekspertləri layihə çərçivəsində daha bir məqaləni Xocalı soyqırımı haqqında hazırlayaraq nəşr ediblər. Çexiyanın ən çox oxunan www.ceşke.moviny saytında dərc olunmuş "20 il öncə törədilmiş Xocalı soyqırımının aktuallığı" məqaləsində 1992-ci il Xocalı qətliamının təfsilatı açıqlanır. Məqalədə qeyd edilir ki, erməni silahı birləşmələri Dağlıq Qarabağda yerləşən nizami rus hərbi alayının köməyi ilə gecə hücum edərək dinc şəhəri yerlə-yeksan etmiş, minlərlə sakini vəhşicəsinə qətlə yetirmişlər. Məqalədə Xocalı faciəsinin bir sıra dünya ölkələri tərəfindən azərbaycanlılara qarşı soyqırımı kimi tanındığı və 26 fevral tarixinin Azərbaycan xalqı üçün böyük hüzn günü olduğu vurğulanır.

Məqalə müəllifi ilə əlaqə ünvanı news@trend.az
Bizi Twitter-dən izləyin @trend_az