Azərbaycan, Bakı, 17 yanvar / Trend , müxbir S.İlhamqızı/ Azərbaycanın müxalifət liderlərindən olan Lalə Şövkət hesab edir ki, ölkədə demokratik şərait yaradılmayacağı təqdirdə müxalifət düşərgəsindən seçkidə iştirak edəcək heç bir namizədin qalib gəlmək şansı olmayacaq. O, bu fikirlərini Trend ə müsahibəsində bildirib.
Bu ilin oktyabrında Azərbaycanda növbəti prezident seçkisi keçiriləcək. Müxalifət düşərgəsindən artıq bir neçə partiya seçkidə öz namizədi ilə iştirak edəcəyini açıqlayıb.
Üç müxalifət partiyasını birləşdirən "Azadlıq" bloku seçkiqabağı minimal demokratik şərait yaradılmayacağı təqdirdə prezident seçkisini boykot edəcəyini açıqlayıb.
"Azadlıq" blokunun həmsədri Şövkət bildirib ki, blok hər an seçkidə iştirak etmək iqtidarındadır, lakin bunun üçün qurum seçki komissiyalarının paritet əsasda formalaşdırılmasını, sərbəst toplaşmaq hüququnun və söz azadlığının təmin olunmasını tələb edir: "Biz həqiqi seçkidə iştirak etmək istəyirik, oyunda, imitasiyada yox. Əgər seçkiqabağı minimal demokratik şərait yaradılarsa, "Azadlıq" bloku prezident seçkisində iştirak edəcək. Lakin demokratik şərait yaradılmayacaqsa, növbəti şou qurulacaqsa, biz bu tamaşada dekorasiya rolunu oynamayacağıq" - deyə xanım Şövkət bildirib.
Müxalifət lideri əlavə edib ki, "Azadlıq" bloku seçki prosesinin, seçki komissiyalarının iqtidarın təsiri altından çıxmasını, həmçinin Azərbaycan Konstitusiyasında təsbit olunmuş vətəndaşların sərbəst toplaşmaq hüququnun bərpasını istəyir.
Onun fikrincə, azad sözə görə jurnalistlər həbs olunursa, bu səbəbdən də demokratik seçkidən danışmaq mümkün deyil.
Onun sözlərinə görə, "Azadlıq" bloku bütün müxalifətin eyni mövqedən çıxış etməsini istəyir, lakin seçkidə iştiraka qərar vermiş başqa şəxslərə etiraz edə bilməz: "Çoxları deyə bilər ki, seçkidə iştirak edəcəklər. Amma hamı bilir ki, real namizəd ola bilən 3-4 nəfər var. Onlar doğrudan da ölkə ictimaiyyəti, beynəlxalq təşkilatlar tərəfindən tanınır və hamı bilir ki, həqiqətən iqtidara alternativ ola bilərlər. Lakin əgər kimsə istəyirsə ki, demokratik şərait olmadan seçkidə iştirak edib bu seçkini legitimləşdirsin, bu, onun öz işidir. Amma birmənalı şəkildə deyirəm ki, bu halda heç bir namizədin şansı olmayacaq. Çünki bu, artıq seçki olmayacaq" - deyə "Azadlıq" blokunun həmsədri bildirib.