Azərbaycan, Bakı, 30 yanvar / Trend , müxbir S.İlhamqızı/Azərbaycanda iqtidarla müxalifət arasında ən yaxşı dialoq seçki prosesidir. Bu fikirləri hakim Yeni Azərbaycan Partiyasının sədr müaivni və icraçı katibi Əli Əhmədov çərşənbə günü jurnalistlərə açıqlamasında bildirib.
Müxalifəti təmsil edən ADP, Müsavat partiyaları iqtidarı dialoqa dəvət edən çağırışlar səsləndirirlər. Müsavat Partiyasının başqanı İsa Qəmbər bazar günü partiya Məclisinin iclasında bir daha iqtidarı dialoqa çağırdığını deyib.
İqtidar partiyasında isə hesab edirlər ki, seçkilərdə hakimiyyətə gəlmək uğrunda mübarizə aparılması iqtidarla müxalifət arasında ən qızğın dialoqdur: "Seçki prosesinin özü dialoqdur. Əgər seçkiyə hazırlıqlara başlamışıqsa, deməli, dialoqa da başlamışıq"-deyə YAP-ın icraçı katibi bildirib.
O, əlavə edib ki, iqtidarla müxalifət arasında konkret məsələlər barədə danışıqlara ehtiyac yarandıqda, bunu reallaşdırmaq mümkündür.
YAP-ın icra katbinin müavini Siyavuş Novruzov isə hesab edir ki, müxalifət dialoq təklifində səmimi deyil: "İsa Qəmbər altı-beş danışır, biz onun səmimiyyətinə inanmırıq"-deyə YAP funksioneri çərşənbə günü jurnalistlərə açıqlamasında bildirib.
