...

Müxalifət patiyasının sədrliyinə seçkidə əyalətdəki namizədlərin şansı azdır

Siyasət Materials 1 Fevral 2008 12:41 (UTC +04:00)

Azərbaycan, Bakı, 1 fevral / Trend , müxbir S.İlhamqızı/ Azərbaycan Milli İstiqlal Partiyasının sədrliyinə namizədlər arasında Bakıda yaşayanların şansı daha çoxdur. Bu fikirləri Trend ə açıqlamasında AMİP-in keçmiş sədri Ayaz Rüstəmov bildirib.

Rüstəmov ötən ilin sonunda partiya sədrliyindən istefa ərizəsi yazıb. AMİP-in yeni sədri partiyanın yaxın aylarda keçiriləcək qurultayında seçiləcək. AMİP-in Siyasi Şurasının fevralın 2-də keçiriləcək iclasında Rüstəmovun istefa ərizəsi qəbul ediləcək. Həmçinin partiyanın Mərkəzi Şurasının iclasının vaxtı təyin olunacaq. Mərkəzi Şuranın iclasında isə qurultay çağırılacaq.

AMİP-dən bildirilib ki, sədrliyə hələlik partiyanın Goranboy rayon təşkilatının sədri Fəqan Məhərrəmov və Nərimanov rayon təşkilatının sədri Ələddin Əsgərov iddia edir.

Rüstəmov bildirib ki, hər iki iki şəxsi partiya rəhbərliyinə layiq hesab edir, lakin onun fikrincə, partiya rəhbəri təşkilatı yaxşı idarə edə bilmək üçün paytaxtda yaşamalıdır. Ona görə də Əsgərovu daha çox şanslı hesab edir.

AMİP-in baş katibi, hazırda sədrin səlahiyyətlərini icra edən Fuad Muxtarov Trend ə açıqlamasında bildirib ki, partiya sədrliyinə iddialılar iki nəfərdən çoxdur, lakin digər şəxslər hələlik adlarının açıqlanmasını istəmirlər. Müxtarov da bildirib ki, partiya sədrliyinə Bakıda yaşayan şəxs seçilməlidir: "Əyalətdə oturub partiyanı idarə etmək mümkün deyil. Sədr seçkisində bu amil mütləq nəzərə alınmalıdır"-deyə Muxtarov bildirib.

O, özünün sədrliyə namizəd olub-olmayacağı barədə açıqlama verməkdən imtina edib. Muxtarov həmçinin Rüstəmovun partiya sədrliyindən istefa verməsinin səbəbləri barədə şərh verməkdən imtina edib.

AMİP 1992-ci ildə yaradılan və Azərbaycanda ilk dövlət qeydiyyatına alınan partiyadır. Müxalifəti təmsil edən AMİP-in qurucusu və 2004-cü ilin sonunadək sədri olan Etibar Məmmədov hazırda Beynəlxalq Demokrat İttifaqının (BDİ) sədr müavinidir.

Xəbər lenti

Xəbər lenti