Azərbaycan, Bakı 05 fevral / Trend , müxbir İ.Əlizadə/ Rəsmi Tehran Dağlıq Qarabağ münaqişəsinin həllinə kömək etməyə hazırdır. "İran Dağlıq Qarabağ münaqişəsinin sülh yolu ilə həllinə tərəfdardır və bu prosesə kömək etməyə hazırdır", -deyə çərşənbə axşamı Azərbaycan parlamentinin nümayəndə heyəti ilə görüşündə İran İslam Şurası Məclisinin (parlament) sədri Qulaməli Həddad Adil bildirib. Bu barədə Trend ə telefonla İranda səfərdə olan Azərbaycan parlamenti nümayəndə heyətinin rəhbəri, Milli Məclisin Aqrar siyasət daimi komissiyasının sədri Eldar İbrahimov məlumat verib.
İran parlamentinin sədri bildirib ki, ölkəsi Azərbaycanın ərazi bütövlüyünü tanıyır və Dağlıq Qarabağı Azərbaycanın ayrılmaz tərkib hissəsi hesab edir.
İbrahimov qeyd edib ki, görüşdə İran və Azərbaycan parlamentləri arasında əlaqələrin genişləndirilməsi, qanunların hazırlanması məsələsində təcrübə mübadiləsinin aparılması, İranın Naxçıvan Muxtar Respublikasına qaz və işıq verməsi məsələləri müzakirə olunub.
Azərbaycan parlamentinin nümayəndə heyəti İranın kənd təsərüfatı nazirinin müavini ilə də görüşüb. Görüşdə iki ölkənin kənd təsərrüfatı sahəsində əməkdaşlığının genişləndirilməsi məsələsi müzakirə olunub.
İbrahimovun rəhbərlik etdiyi Azərbaycan parlamenti nümayəndə heyətinin tərkibinə Sosial siyasət daimi komissiyasının sədri Hadi Rəcəbli, Regional məsələlər daimi komissiyasının sədr müavini Fəttah Heydərov, deputatlardan Ərəstun Cavadov, Hüseynbala Mirələmov və Fazil Mustafayev daxildir.