Azərbaycan, Bakı, 3 mart / ", müxbir S.İlhamqızı/ Azərbaycanın müxalif Demokrat Partiyasında (ADP) hesab edirlər ki, müxalifət prezident seçkisində birləşib bir namizədlə iştirak etməsə, iqtidar mütləq qalib gələcək.
"Müxalifət birləşməsə, iqtidarın namizədi obyektiv olaraq qalib gələcək" - deyə ADP-nin Məclis üzvü Qurban Məmmədov Trend ə açıqlamasında bildirib.
Bu ilin oktyabrında Azərbaycanda növbəti prezident seçkisi keçiriləcək. Hakim Yeni Azərbaycan Partiyası indiki prezident İlham Əliyevin seçkidə iştirak edəcəyini və xalqın namizədi olacağını bildirib. Müxalifət düşərgəsindən Müsavat, ADP, BQP, ACP, Ümid partiyaları prezident seçkisində öz namizədləri ilə iştirak edəcəklərini açıqlayıblar.
ADP funksioneri hesab edir ki, müxalifətin vahid namizədi olarsa, İlham Əliyevlə müxalifətin namizədi bərabər sayda səs toplayacaq.
"Prezident seçkisində iqtidarla müxalifətin şansı təxminən bərabərdir. Çünki həm iqtidarın, həm də müxalifətin qalib gəlməsi, xalqın etimadını qazanması üçün haqlı, obyektiv səbəbləri var. Amma müxalifət seçkidə bir neçə namizədlə iştirak etsə, 50 faiz səs müxalifətin namizədləri arasında bölünəcək" - Məmmədov bildirib.
Müxalifət funksioneri əlavə edib ki, hakimiyyətin əlində inzibati resurslar, geniş maddi imkanlar var və bunlar onun şansını artırır. Həmçinin Məmmədov hesab edir ki, İlham Əliyevin son zamanlar gördüyü işlər - yeni iş yerlərinin açılması, maaşların artırılması, regionda və dünyada apardığı xarici siyasəti, Azərbaycanın iri beynəlxalq layihələri uğurla həyata keçirməsi də indiki prezidentin şansını artıran obyektiv amillərdir.
Məmmədovun fikrincə, müxalifət budəfəki seçkidə ADP-nin prezidentliyə namizədi Sərdar Cəlaloğlunun ətrafında birləşməlidir. ADP özü isə başqa namizədə güzəştə getmək fikrində deyil.
Sağ təmayüllü müxalifətçi partiya ADP 1991-ci ildə Cəlaloğlu tərəfindən təsis edilib. Partiya 2007-ci ilin yanvarınadək iqtidara qarşı radikal müxalif mövqedə olub. 2007-ci ilin yanvarında ADP-nin hakimiyyətlə dialoq qurulması ilə bağlı yeni siyasi kursu qəbul edilib.