Azərbaycan, Bakı, 13 mart / Trend ", müxbir Q.Cəbiyev/ Azərbaycanın müxalif Demokrat Partiyası (ADP) namizədi ətrafında siyasi partiyalardan ibarət blok yaratmaq fikrindən yayınıb. "Biz indi partiyalarla blok yaratmaq istiqamətində işi arxa plana keçirmişik. Çünki bloklaşma ilə bağlı əhval-ruhiyyə çox aşağıdır" cümə axşamı Trend a a ADP sədri Sərdar Cəlaloğlu bildirib.
Azərbaycanda seçkilər oktyabrda keçiriləcək. ADP Ali Şurası fevralın 16-da Cəlaloğlunun prezidentliyə namizədliyini irəli sürüb.
Cəlaloğlu ADP-nin digər partiyaların elektoratının səsini almağa cəhd etmədiyini bildirib. Onun sözlərinə görə, ümumiyyətlə siyasi qüvvələr bir-birlərinin elektoratına iddia etməməlidirlər. "Mənim gücüm yetsə belə, millətçilərin, dinçilərin, sosial-demokratların və başqalarının elektoratını öz tərəfimə çəkməməliyəm" - deyən Cəlaloğlu bunun doğru olmadığını və nəticə etibarı ilə uğur vəd etmədiyini vurğulayıb. "Biz cəmiyyətdə uzlaşma, iqtiadr-müxalifət düşmənçiliyinə son qoyulması və dialoq istəyən elektoratın səsini almağa ümid edirik" ADP sədri əlavə edib.
Sağ təmayüllü partiya olan ADP 1991-ci ildə Cəlaloğlu tərəfindən təsis edilib. Partiya ötən ilin yanvarınadək iqtidara qarşı radikal müxalif mövqedə olub. Ötən ilin yanvarında ADP-nin hakimiyyətlə dialoq qurulması ilə bağlı yeni siyasi kursu qəbul edilib. Buna etiraz olaraq keçmiş sədr Rəsul Quliyev və tərəfdarları ADP-dən imtina edərək özlərinin Açıq Cəmiyyət Pariyasını (ACP) yaradıblar.
