Azərbaycan, Bakı, 15 aprel / Trend , müxbir İ.Əlizadə/ Azərbaycanın qərbində yerləşən Xanlar rayonunun İcra Hakimiyyəti rəhbərliyi və sakinləri rayonun adının dəyişdirilərək Cavadxan adlandırılmasına etiraz edirlər.
"Toponomiya Komissiyasının çıxardığı qərara etiraz əlaməti olaraq rayon ziyalıları, ağsaqqalları, əhalinin müxtəlif təbəqələri rayon İcra Hakimiyyətinə, yuxarı dövlət orqanlarına çoxsaylı müraciətlər edərək hüquqlarının tapdanmasının qarşısının alınmasını, irəli sürdükləri təklifi müdafiə edərək, rayonun adının dəyişdirilib Göygöl adlandırılmasını təkidli şəkildə tələb edirlər", deyə Xanlar rayon İcra Hakimiyyətinin başçısı Arif Seyidovun Azərbaycan Parlamenti yanında Toponomiya Komissiyasına göndərdiyi məktubda bildirilib.
Toponomiya Komissiyası aprelin 9-da Xanlar rayonunun adının dəyişdirilib Göygöl adlandırılması ilə bağlı rayon İcra Hakimiyyətinin və sakinlərin müraciətinə baxıb. Komissiya Xanlar rayonunun Göygöl adlandırılması ilə razılaşmayıb. Toponomiya Komissiyası Xanlar rayonunun Cavadxan adlandırılması ilə bağlı tövsiyə irəli sürüb və müzakirə edilməsi üçün Xanlar rayon İcra Hakimiyyətinə göndərib.
Seyidovun məktubunda qeyd olunub ki, rayon əhalisinin Toponomiya Komissiyasının çıxardığı qərara etirazını nəzərə alaraq, rayonun adı dəyişdirilərək Göygöl adlandırılsın.
Onun sözlərinə görə, Xanların adının dəyişdirilməsi ilə bağlı rayonda 127 iclas keçirilib. İclaslarda 7927 nəfər iştirak edib və onların əksəriyyəti rayonun Göygöl adlandırılmasını dəstəkləyib.
"Buna baxmayaraq, Toponomiya Komissiyasının üzvləri rayon əhalisinin təklifini nəzərə almayıb və Xanların Cavadxan adlandırılmasını məqsədəuyğun hesab ediblər. Cavadxanın Azərbaycan tarixində xüsusi xidmətləri olsa da, onun rayonun tarixi ilə heç bir bağlılığı və əlaqəsi olmadığı halda, Toponomiya Komissiyası üzvlərinin hansı məqsədlə belə bir qərar qəbul etməsi rayon sakinlərini hiddətləndirərək ciddi etiraza səbəb olub" deyə məktubda qeyd olunub.
Hazırda Toponomiya Komissiyası Xanların adının dəyişdirilməsi məsələsinə baxır.
Məqalə müəllifi ilə əlaqə ünvanı: [email protected]