Azərbaycan, Bakı, 05 may / Trend , müxbir E.Babayev/ Hakim Yeni Azərbaycan Partiyası (YAP) seçki kampaniyası dövründə kütləvi aksiyalar keçirmək niyyətindədir və bu aksiyalar Bakı Şəhər İcra Hakimiyyətinin icazə verdiyi yerlərdə baş tutacaq. Bu barədə bazar ertəsi Trend a YAP icra katibinin müavini, millət vəkili Mübariz Qurbanlı məlumat verib.
Mayın 1-də Bakı Şəhər İcra Hakimiyyəti Müsavat Partiyasının mayın 4-də keçirmək istədiyi aksiyaya icazə verib. İcra Hakimiyyəti kütləvi aksiyanın keçirilməsi üçün partiyanın istədiyi yerləri (Ukrayna meydanını, keçmiş "Qələbə" kinoteatrının qarşısını və ya metronun "Nərimanov" stansiyası yaxınlığındakı ərazilərdən birini) yox, Bibiheybət qəsəbəsini göstərib. Bundan sonra partiya aksiyanı təxirə salıb və meriyanı məhkəməyə verəcəyini bəyan edib.
Azərbaycanda prezident seçkisi oktyabrın 15-də keçiriləcək. Ölkədə seçki kampaniyası səsvermə gününə 4 ay qalmış başlayacaq,
Qurbanlının fikrincə, müxalifətin şəhərin mərkəzi meydanlarına can atması sosial bazasının zəif olması ilə bağlıdır. "Onlar şəhərin mərkəzində səs-küy salmaqla əhalini öz başlarına yığmaq niyyəti güdürlər. Məsafənin uzaq olması müxalifətin bəhanəsindən başqa bir şey deyil" Qurbanlı əlavə edib. Onun sözlərinə görə, YAP Bibiheybət qəsəbəsində aksiya keçirməyə hazırdır.
YAP 1992-ci ildə Naxçıvanda keçmiş prezident Heydər Əliyev tərəfindən yaradılıb. 14 ildən artıqdır, hakimiyyətdə olan partiyanın hazırkı sədri prezident İlham Əliyevdir.
Məqalə müəllifi ilə əlaqə ünvanı: [email protected]
