Azərbaycan, Bakı, 05 may / Trend , müxbir E.Babayev, İ.Əlizadə/ Azərbaycanın sağ təmayüllü müxalif Demokrat Partiyası (ADP) bəyan edib ki, ölkədə etiraz aksiyaları keçirmək üçün sosial sifariş yoxdur. "Aksiyalar keçirmək üçün ciddi səbəblər olsa da, bu, hələ sosial sifarişə çevrilməyib" bazar ertəsi Trend a ADP sədri Sərdar Cəlaloğlu deyib.
Mayın 1-də Bakı Şəhər İcra Hakimiyyəti müxalif Müsavat Partiyasının mayın 4-də keçirmək istədiyi aksiyaya icazə verib. İcra Hakimiyyəti kütləvi aksiyanın keçirilməsi üçün partiyanın istədiyi yerləri (Ukrayna meydanını, keçmiş "Qələbə" kinoteatrının qarşısını və ya metronun "Nərimanov" stansiyası yaxınlığındakı ərazilərdən birini) yox, Bibiheybət qəsəbəsini göstərib. Buna görə də partiya aksiyanı təxirə salıb.
Cəlaloğlu deyib ki, Müsavatın aksiyanı təxirə salması heç də şəhərdən kənarda yer ayrılması ilə bağlı deyil. "Əgər Müsavat meriyanın icazə verdiyi yerə getsə, istənilən sayda adam toplaya bilməyəcək. Yaxud izazəsiz aksiya keçirsə, yenə də əhali buna dəstək verməyəcək. Ona görə də Müsavat bunları nəzərə almalıdır və biz onları aksiya ilə bağlı qərarlarını qeyri-ciddi sayırıq. ADP olaraq sosial sifarişin yetişməsini gözləyirik" Cəlaloğlu əlavə edib.
Müxalif "Azadlıq" blokunun həmtəsisçisi, Vətəndaş və İnkişaf Partiyasının (VİP) sədri Əli Əliyev də Trend a kütləvi aksiyaların keçirilməsi üçün hələlik sosial sifarişin olmadığını deyib. "2005-ci il parlament seçkisindən sonra Azərbaycan cəmiyyətində durğunluq yaranıb. Cəmiyyət ölkədə hər hansı dəyişikliyin baş verməsinə ümidli deyil və ona görə də siyasi proseslərə, o cümlədən etiraz aksiyalarına maraq göstərmir" VİP sədri əlavə edib.
"Azadlıq" bloku seçki mühitinin dəyişməyəcəyi təqdirdə prezident seçkisini boyok edəcəyini açıqlayıb.
Müxalif Ümid Partiyasının sədri İqbal Ağazadə bildirib ki, partiyanın strategiyasında etiraz aksiyalarının keçirilməsi nəzərdə tutulmayıb. Çünki buna ehtiyac yoxdur.
Mitinq taktikasına üstünlük verən Müsavat Partiyasının Mərkəzi İcra Aparatının sədri Arif Hacılı Trend a bildirib ki, kütləvi aksiyaların əleyhinə çıxan müxalifət partiyaları Azərbaycanın mövcud situasiyasını düzgün qiymətləndirmirlər.
Sağ təmayüllü partiya olan ADP 1991-ci ildə Cəlaloğlu tərəfindən təsis edilib. Partiya ötən ilin yanvarınadək iqtidara qarşı radikal müxalif mövqedə olub. Ötən ilin yanvarında ADP-nin hakimiyyətlə dialoq qurulması ilə bağlı yeni siyasi kursu qəbul edilib. Buna etiraz olaraq keçmiş sədri Rəsul Quliyev və tərəfdarları ADP-dən imtina edərək özlərinin Açıq Cəmiyyət Pariyasını (ACP) yaradıblar.
Məqalə müəllifi ilə əlaqə ünvanı: [email protected]
