Azərbaycan, Bakı, 08 may / Trend , müxbir İ.Əlizadə/ Azərbaycan müxalifət partiyalarının təmsil olunduğu Demokratik Seçki Mərkəzi Azərbaycanla Ermənistan arasında atəşkəs müqaviləsinin bağlanmasının 14-cü ildönümü ilə bağlı mayın 12-nə planlaşdırdığı aksiyanı təxirə salıb. "Bakı şəhər İcra hakimiyyəti aksiyanın şəhərin kənarında yerləşən Bibiheybət stadionunda keçirilməsinə icazə verib. Lakin bizim ora getmək planımız yoxdur və ona görə də aksiyanı təxirə salmışıq", - deyə cümə axşamı Demokratik Seçki Mərkəzinin həmtəsisçi, Bütöv Azərbaycan Xalq Cəbhəsi Partiyasının sədri, deputat Qüdrət Həsənquliyev bildirib.
1994-cü il mayın 12-də Bişkekdə Azərbaycanla Ermənistan arasında cəbhə bölgəsində atəşin dayandırılması haqqında saziş imzalanıb. Sazişi Azərbaycan və Ermənistanın parlament sədrləri imzalayıb. Ermənistanın Azərbaycan qoşunlarının təmas xəttində atəşkəs rejimini tez-tez pozmasına baxmayaraq, Bişkek sazişi hələ də qüvvədədir.
Həsənquliyev qeyd edib ki, Bakı şəhər İcra Hakimiyyətinin şəhərin mərkəzi hissələrində kütləvi aksiyalara icazə verməməsi qanunsuzdur:"Necə olur ki, rəsmi tədbirlər zamanı nəqliyyatın hərəkətinə problem yaranmır? Amma bunu bəhənə gətirib, kütləvi aksiyalara icazə vermirlər".
O bildirib ki, Bibiheybət şəhərin kənarında yerləşir və ora nəqliyyat yaxşı işləmir. Ona görə də orada aksiya keçirmək mümkün deyil.
