Azərbaycan, Bakı, 14 may / Trend , müxbir E.Babayev/ Sol təmayüllü müxalif Azərbaycan Sosial Demokrat Partiyasının (ASDP) bu ay keçirilməsi nəzərdə tutulan qurultayı təxirə düşüb. "Qurultay partiyadaxili məsələlərlə bağlı təxirə salınıb" çərşənbə günü Trend -a ASDP həmsədri Araz Əlizadə deyib.
Azərbaycanda prezident seçkisi oktyabrda keçiriləcək. ASDP seçkidə öz namizədi ilə iştirak etmək niyyətindədir. İndiyə qədər Müsavat, Demokrat, Yaşıllar partiyaları namizədlərinin adlarını açıqlayıblar. Hakim Yeni Azərbaycan Partiyası isə seçkidə indiki dövlət başçısı İlham Əliyevin namizədliyini irəli sürəcək.
Əlizadə qurultayın sentyabr-oktyabr aylarında keçiriləcəyini vurğulayıb. "Qurultayın təxirə düşməsinin səbəbi sırf partiyadaxili məsələ ilə bağlıdır və bunu açıqlamaq məqsədəuyğun deyil. Qurultayda struktur dəyişiklikləri aparılmayacaq. Kadr dəyişikliklərinin olması isə qurultay nümayəndələrinin qərarından asılı olacaq" - deyən Əlizadə bildirib ki, partiyanın seçki ilə bağlı qərarları isə ASDP-nin yaxın vaxtlarda keçiriləcək Mərkəzi Plenumunda veriləcək. "Biz seçkidə öz namizədimizlə iştirak edəcəyik. Başqa bir namizədin dəstəklənməsi nəzərdə tutulmur" - deyə o əlavə edib.
Onun sözlərinə görə, Azərbaycanda seçkiqabağı mühit tam demokratikdir. Əlizadə bildirib ki, həmkarlarının iddiaları əsassızdır. "Azərbaycan müxalifəti prezident seçkisinin favoritinin indiki prezident İlham Əliyev olduğunu dərk edirlər. Ona görə də müxtəlif bəhanələr gətirirlər" ASDP həmsdəri əlavə edib.
ASDP sol təmayüllü müxalifət partiyasıdır. Partiyanın həmsədri Araz Əlizadə, digər həmsədri isə Azərbaycanın eks-prezidenti, hazırda mühacirətdə yaşayan Ayaz Mütəllibovdur. 1991-ci ildə Azərbaycan müstəqilliyini elan etdikdən sonra Mütəllibov ilk prezident seçilib. 1992-ci ildə Xalq Cəbhəsi Hərəkatının hakimiyyətə gəlişindən sonra o, ölkəni tərk edib, o vaxtdan indiyədək Rusiyada mühacirətdə yaşayır. Eks-prezident Azərbaycanın Baş Prokurorluğunun ittihamı əsasında beynəlxalq axtarışa verilib. Mütəllibov dövlət çevirilişinə cəhd, qanunsuz silahlı dəstələrin yaradılması, zorla hakimiyyəti ələ almaq və digər ağır cinayətlər törətməkdə günahkar bilinir.
Məqalə müəllifi ilə əlaqə ünvanı: [email protected]
