Azərbaycan, Bakı, 03 iyun / Trend , müxbir S.İlhamqızı, R.Hafizoğlu/ Türkiyədə 20 ildən çoxdur dindar qadınların dövlət idarələrinə, təhsil müəssisələrinə baş örtüyündə daxil olmasına qoyulan qadağanan götürülməsi üçün ekspertlərin fikrincə, Konstitusiyada dəyişikliklər edilməlidir. "Baş örtüyü probleminin həlli yalnız Türkiyə Konstitusiyasına dəyişiklik edilməsindən sonra mümkün ola bilər" - deyə türkiyəli ekspert Altan Tan Trend -a bildirib.
İyunun 5-də Türkiyənin Konstitusiya Məhkəməsində dövlət və təhsil müəssisələrində baş örtüyünə (hicaba) qoyulan qadağanın saxlanılıb-saxlanılmaması məsələsinə baxılacaq. Hakim Ədalət və İnkişaf Partiyası qadağanın aradan qaldırılmasını, müxalifət partiyaları isə qadağanın saxlanılmasını tələb edirlər.
Müstəqil ekspert Tan hesab edir ki, Konstitusiya Məhkəməsi qadağanın götürülməsinə müsbət rəy verməyəcək. Onun fikrincə, hazırki hakimiyyət də baş örtüyünə qoyulan qadağanın aradan qaldırılmasına nail ola bilməyəcək. "Məsələ Konstitusiyanın dəyişdirilməsindən sonra mümkün ola bilər ki, bu da asan məsələ deyil. Çünki müxalifət Konstitusiyanın dəyişdirilməsinə də müsbət yanaşmayacaq" - deyə Tan çərşənbə axşamı İstanbuldan telefonla bildirib.
Ekspertin rəyinə görə, baş örtüsü probleminin həll olunmaması dindarlarla dünyəvilər arasında kəskin qütbləşməyə gətirib çıxaracaq. Qütbləşmə isə, Türkiyənin milli maraqlarına, demokratik dəyərlərinə zərbə olacaq - deyə ekspert hesab edir.
"Konstitusiya Məhkəməsi baş örtüyü qadağasının götürülməsinə qərar verərsə, bu, AKP-nin qələbəsi olacaq və bu partiyanın bağlanması iddiası da qüvvəsini itirəcək" - deyə türkiyəli ekspert Mustafa Özcan Trend -a bildirib.
Müxalifətçi Cümhuriyyət Xalq Partiyası (CHP) hakim Ədalət və İnkişaf Partiyasının baş örtüyünə qadağanın götürülməsini tələb etdiyinə görə, onun bağlanması iddiası ilə məhkəməyə müraciət edib.
Özcan hesab edir ki, məhkəmə CHP-nin iddiasını rədd edərsə, bu, dolayısıyla baş örtüyünə qoyulan qadağanın da götürülməsinə gətirib çıxaracaq: "Konstitusiya Məhkəməsi baş örtüyünə qoyulan qadağanı ləğv etsə, AKP-nin bağlanması iddiası da qüvvəsini itirəcək və partiyanın fəaliyyətini dayandırması çətinləşəcək" - deyə ekspert çərşənbə axşamı telefonla İstanbuldan bildirib.
Politoloqun fikrincə, başörtüyü qadağası və AKP-nin bağlanması iddiaları mübahisəli məsələyə çevriləcək, bu da Türkiyədə gənginliyə səbəb olacaq: "Çünki müxalifətçilər israrla AKP-nin bağlanmasını tələb edirlər, əsas səbəbləri də AKP-nin baş örtüyünü müdafiə etməsidir. Amma hicaba qadağanın Konstitusiya Məhkəməsi tərəfindən aradan qaldırılması AKP-nin qələbəsi olacaq, bu isə Türkiyədə qütbləşməni, gərginliyi artıracaq" - deyə Öczan bildirib.
O, Türkiyədə əhalinin 60-70 faizinin baş örtüyünə sərbəstlik verilməsinin tərəfdarı olduğunu deyib. Politoloq hesab edir ki, Konstitusiya Məhkəməsi çoxluğun fikrini nəzərə alaraq, qadağanı ləğv edərsə, Türkiyə xalqı buna sevinəcək.
Dünyada dünyəviliyin 182 növu olduğunu xatırladan politoloqun sözlərinə görə, ən qatı, radikal dünyəvilik məhz Türkiyədə tətbiq olunur. Qatı dünyəvi dövlət olan Fransada belə, dövlət idarələrində, təhsil müəssisələrində baş örtüyünə sərbəstlik verilib, lakin Türkiyədə, ibtidai sinifdən universitetlərə qədər, təhsil müəssisələrində baş örtüyü qadağandır.
"Türkiyənin dünyəvilik prinsipləri yenidən nəzərdən keçirilməlidir. Əgər Türkiyə hicab qadağasını götürərək, eyni zamanda dünyəviliklə bağlı mövcud kriteriyaları tətbiq edərsə, o zaman problem və gərginlik də qalmayacaq" - deyə türkiyəli ekspert bildirib.
Məqalə müəllifi ilə əlaqə saxlamaq üçün elektron ünvan [email protected]
