Azərbaycan, Naxçıvan, 04 iyun / Trend , müxbir M.Quliyev/ Azərbaycan prezidenti İlham Əliyev hesab edir ki, Türkiyə ilə bütün sahələrdə uğurlu əməkdaşlıq bölgədə hər iki ölkənin mövqelərinin möhkəmlənməsinə xidmət edir. "Bütün məsələlərdə Azərbaycanla Türkiyənin mövqeləri üst-üstə düşür", - deyə İlham Əliyev bu gün Türkiyənin Baş naziri Rəcəb Tayyib Ərdoğan ilə Naxçıvanda keçirilən görüşündə bildirib.
Türkiyə Baş nazirinin başçılığı ilə nümayəndə heyəti Azərbaycanın Naxçıvan Muxtar Respublikasına rəsmi səfərə gəlib. Ərdoğanla prezident Əliyev arasında təkbətək görüş başa çatdıqdan sonra danışıqlar nümayəndə heyətlərinin iştirakı ilə geniş tərkibdə davam etdirilib.
Prezident Əliyev Baş nazir Ərdoğanla görüşdə bu səfərin böyük əhəmiyyət daşıdığını və nəticələrin uğurlu olacağına əminliyini ifadə edib. Qeyd edib ki, Azərbaycanla Türkiyə arasında əməkdaşlıq geniş və çoxşaxəlidir, iki ölkənin birgə layihələri də uğurla davam etdirilir. "Naxçıvan Türkiyə ilə Azərbaycan arasında yeganə sərhəd bölgəsidir. Türkiyənin Baş nazirinin böyük nümayəndə heyəti ilə Naxçıvana səfəri əməkdaşlığımıza verilən böyük önəmin göstəricisidir", - deyə prezident bildirib.
Baş nazir Ərdoğan isə qeyd edib ki, Türkiyə-Azərbaycan əlaqələri bütün sahələrdə yüksələn xətt üzrə inkişaf edir. Baş nazir bu görüşdə Türkiyə hökumətini təmsil edən nazirlərin də iştirakının Azərbaycan-Türkiyə əməkdaşlığına yeni töhfələr verəcəyinə əminliyini dilə gətirib. "Sərhəd bölgəsi olan Naxçıvan Türkiyə üçün də xüsusi əhəmiyyət daşıyır", - deyən Ərdoğan Naxçıvanı çoxdan görmək istədiyini və bu ziyarətdən məmnun olduğunu bildirib.
Türkiyənin hökumət başçısı hesab edir ki, Azərbaycanla Türkiyənin birgə layihələr həyata keçirməsi bu iki ölkənin regionda mövqelərinin möhkəmlənməsinə xidmət edir. "Azərbaycanla Türkiyənin enerji sahəsindəki sıx əməkdaşlığı hər iki tərəfə böyük fayda gətirir", - deyə Ərdoğan bildirib. Baş nazir Bakı-Tbilisi-Ceyhan, Bakı-Tbilisi-Ərzurum neft-qaz kəmərlərinin bu baxımdan xüsusi əhəmiyyət daşıdığını vurğulayıb.
Məqalə müəllifi ilə əlaqə saxlamaq üçün elektron ünvan: [email protected]
