Azərbaycan, Bakı, 10 iyun / Trend , müxbir D.Xatınoğlu/ İranlı ekspertlərin fikrincə, dünya birjalarında neftin qiymətinin qəfildən doqquz faiz artmasına İsrailin nəqliyyat nazirinin rəsmi Qüdsün İrana hücum edəcəyi barədə bəyanatının və Avropa Mərkəzi Bankı rəsmilərinin proqnozları təsir edib. "İran və İsrail rəsmilərinin bir-birini təhdid etməsi dünyada neftin qiymətinin artması və onların bundan xeyir götürməsi məqsədilə edilir", - deyə Tehran Universitetinin iqtisadiyyat elmləri üzrə professoru Bijən Bidabad Trend -a bildirib.
İsrailin nəqliyyat naziri Şaul Mofaz iyunun 5-də yerli "Yediot Axronot" qəzetinə müsahibəsində bildirib ki, İran nüvə proqramını dayandırmasa, İsrail qısa zamanda Tehrana hücum edəcək. Elə həmin gün dünyada neftin qiymətində 9 faiz artma müşahidə olundu. Bəzi ekspertlərin fikrincə, bu artım Mofazın bəyanatı ilə əlaqədar oldu.
"İsrail və ABŞ İranı, yaxud əksinə, İran onları müharibə ilə təhdid etdiyi zaman neftin qiymətində artım yaranır. Bu isə hər üç ölkənin mənafeyinə xidmət edir. Əslində, İran və İsrailin bir-birini təhdid etməsi "zərgərlik və pul davası"dır", - deyə Bidabad telefonla Tehrandan bildirib.
Onun qənaətinə görə, İran öz neftini baha satmaqla böyük mənfəət əldə edir, İsrail və Amerikanın isə böyük neft şirkətləri var və dünyanın neft mafiyası onlara bağlıdır. "ABŞ neftə pul ayırır, daha sonra Orta Şərq ölkələrinə silah və digər sənaye məhsulları satmaqla həmin məsrəfləri yenidən öz iqtisadiyyatına geri qaytarır. Buna görə də beynəlxalq miqyasda yarana biləcək təhlükələr hər üç ölkəyə xeyir gətirir", - deyə Bidabad hesab edir.
"İsrailin İranı hədələməsinin neftin qiymətinə təsiri ola bilər, lakin bu təsir o qədər də böyük deyil. Dünyadakı neft bazarı artıq bu növ bəyanatlara adət edib. Məncə, neftin bahalaşmasında rol oynayan əsas amil, cümə günü dolların məzənnəsinin aşağı düşməsidir", - deyə Fransada fəaliyyət göstərən iranlı ekspert, Durham Universitetinin iqisadiyyat üzrə professoru Xavənd Trend -a bildirib.
Avropa Mərkəzi Bankının rəsmiləri, xüsusilə də bu bankın sədri Jan-Klod Trike (Jean-Claude Trichet) bildirmişdi ki, yaxın gələcəkdə avronun məzənnəsi artacaq. "Bu açıqlama üzündən cümə günü dolların məzənnəsi enmişdi. Dolların məzənnəsi aşağı düşəndə isə biznesmenlər dərhal xammallar, xüsusilə də neft bazarına "hücum"a keçirlər və bu da neftin bahalaşmasına gətirib çıxarır", - deyə Xavənd bazar ertəsi telefonla Parisdən bildirib.
Hazırda dünyada neftin bir barelinin qiyməti 139 ABŞ dolları təşkil edir.
