Azərbaycan, Bakı, 23 iyun/ Trend , müxbir C.Babayeva/ Azərbaycanın Yaşıllar Partiyası müxalifətin Məşvərət Şurasında ("beşlər" formatı) təmsil olunmaq fikrindən daşınıb. "Yaşıllar Partiyası "beşlər"də təmsil olunmaq üçün quruma 3-4 dəfə müraciət ünvanlasa da, partiyanın ideoloji cəhətdən möhkəmliyi Müsavat sədrini narahat ediyinə görə, qurumda təmsil olunmağımız mümkün olmayıb", - deyə Yaşıllar Partiyasının sədri Mais Güləliyev bazar ertəsi Trend -a bildirib.
Trend -un arayışı: Azərbaycanın müxalifət partiyalarının "beşlər" formatı ötən il yaradılıb və qurumda Azərbaycan Demokrat, Müsavat, Tərəqqi, Milli İstiqlal partiyaları və "Azərbaycan Naminə" İctimai Forum təmsil olunur.
Güləliyevin sözlərinə görə, Yaşıllar Partiyasının həmin qurumda təmsil olunmasına Müsavat Partiyasının sədri İsa Qəmbərin etiraz edib. "Beşlər" formatında Müsavat Partiyasından başqa təmsil olunan siyasi qurumlar Yaşıllar Partiyasının həmin formatda təmsil olunmasının tərəfdarı olduqlarını bildiriblər. "Müsavat Partiyasının, müxalifətin birliyindən danışsa da, bu birliyin baş tutmamasında müstəsna rolu var. Partiyanın ideologiyası zəifləyib və yeni partiyalara qısqanclıqla yanaşması qorxaqlığını üzə çıxarıb", - deyə partiyanın sədri bildirib.
Məsələ ilə bağlı Müsavat Partiyasının Mərkəzi İcra Aparatının rəhbəri Arif Hacılının bazar ertəsi Trend -a bildirdiyinə görə, onun ümumiyyətlə Azərbaycanda Yaşıllar Partiyasının mövcudluğu barədə heç bir məlumatı yoxdur.
Trend -un arayışı: Azərbaycanın Yaşıllar Partiyası 2007-ci ildə yaradılıb. Partiyanın sədri Mais Güləliyev oktyabrın 15-də keçiriləcək prezident seçkisində iştirak etmək barədə qərar qəbul edib.
Məqalə müəllifi ilə əlaqə ünvanı: [email protected]
