...

Azərbaycan müxalifətinin Məşvərət Şurası yeni bloklaşmanın yaranacağını real hesab etmir

Siyasət Materials 24 İyun 2008 13:17 (UTC +04:00)

Azərbaycan, Bakı, 24 iyun/ Trend , müxbir C.Babayeva/ Azərbaycanın Yaşıllar Partiyası ilə müxalifət partiyalarının Məşvərət Şurasında ("beşlər" formatı) təmsil olunan hər hansı bir partiyanın bloklaşma yaratması ehtimalı sıfra bərabərdir. Bu barədə çərşənbə axşamı Trend -a "beşlər" formatında təmsil olunan Azərbaycan Milli İstiqlal Partiyasının (AMİP) mətbuat və təbliğat katibi Əli Orucov bildirib.

Trend -un arayışı: Azərbaycanın müxalifət partiyalarının "beşlər" formatı ötən il yaradılıb və qurumda Azərbaycan Demokrat, Müsavat, Tərəqqi, Milli İstiqlal partiyaları və "Azərbaycan Naminə" İctimai Forum təmsil olunur. Qurumda təmsil olunan Müsavat Partiyasının başqanı İsa Qəmbərin, Azərbaycan Demokrat Partiyasının sədri Sərdar Cəlaloğlunun namizədliyi təmsil olunduqları partiyalar tərəfindən irəli sürülüb. "Azərbaycan Naminə" İctimai Forumun rəhbəri Eldar Namazov müstəqil şəkildə namizədliyini irəli sürüb.

Şənbə günü Yaşıllar Partiyasının sədri Mais Güləliyevin Trend -a verdiyi məlumata əsasən, Yaşıllar Partiyası və müxalifət partiyalarının "beşlər" formatında təmsil olunan iki partiya yeni siyasi blok yaradacaq.

Orucovun sözlərinə görə, "beşlər"də təmsil olunan partiyalar bu qurumu indiki vəziyyət üçün hələlik real və ideal forma hesab edir. ""Beşlər"də təmsil olunan partiyaların yeni bloklaşmaya qoşulmasından söhbət belə gedə bilməz", - deyə Orucov əlavə edib.

Yaşıllar Partiyasının "beşlər" formatında təmsil olunması ilə bağlı quruma ünvanladığı müraciətə gəlincə, Orucov bildirib ki, qurumda qərarlar konsensus əsasında qəbul olunur və əksəriyyət "yaşıllar"ın qurumda təmsil olunmasına razılıq verməyib. ""Beşlər" formatı qurumda başqa siyasi partiyaların təmsil olunmasını məqbul hesab etmir. Qurumda təmsil olunan siyasi qüvvələrin tərkibi nə qədər geniş olsa, problemləri bir o qədər çox olacaq. Ona görə də bu məsələyə xüsusi ehtiyat və diqqətlə yanaşırıq", - deyə Oruc bildirib.

Məqalə müəllifi ilə əlaqə ünvanı: [email protected]

Xəbər lenti

Xəbər lenti