Azərbaycan, Bakı, 04 iyul / Trend , müxbir İ.Əlizadə / Azərbaycanın hakim partiyası Avropa Şurası Parlament Assambleyasının (AŞPA) oktyabrın 15- də Azərbaycanda keçiriləcək prezident seçkisini izləyəcək Monitorinq Missiyasının seçkiyə obyektiv qiymət verəcəyinə ümid edir. "AŞPA həmişə seçkilərə qeyri - obyektiv qiymət verib. Bu qurum Azərbaycanda müxalifətin, Ermənistanda isə, hakimiyyətin xeyrinə subyektivliyə yol verir və seçkilərə obyektiv qiymət vermir", - deyə cümə günü jurnalistlərə açıqlamasında hakim Yeni Azərbaycan Partiyası (YAP) icra katibinin müavini, deputat Mübariz Qurbanlı bildirib.
Trend -un arayışı: Azərbaycanda keçiriləcək prezident seçkilərini AŞPA-nın 38 nəfərdən ibarət Monitorinq Missiyası izləyəcək. Missiyaya AŞPA-nın Azərbaycan üzrə həmməruzəçisi Andres Herkel rəhbərlik edəcək.
Azərbaycan hakimiyyəti, o cümlədən hakim partiya dəfələrlə Herkeli ölkədə baş verən proseslərə qeyri - obyektiv yanaşmada ittiham edib. Azərbaycanın AŞPA - dakı nümayəndə heyəti qurumun Bürosunda keçirilən müzakirələr zamanı Herkelin missiyaya rəhbər təyin olunmasına etirazını bildirib.
Qurbanlı qeyd edib ki, AŞPA Monitorinq Missiyası siyasi və geosiyasi maraqları əsas götürməsə, seçkiyə obyektiv rəy verəcək.
"AŞPA Monitorinq Missiyasına kimin rəhbər təyin olunması bizi narahat etmir. Çünki prezident seçkisində seçicilərin böyük əksəriyyətinin YAP-ın namizədi İlham Əliyevə səs verəcəyinə əminik", -deyə YAP rəsmisi əlavə edib.
Məqalə müəllifi ilə əlaqə ünvanı: [email protected]
