Azərbaycan, Bakı, 05 iyul/ Trend , müxbir E.Babayev/ Azərbaycanda bu il keçiriləcək prezident seçkisində bir sıra müxalif partiyalarının iştirak etməməsi seçkinin nəticələrinin legitimliyinə təsir etməyəcək. "Bəzi müxalifət partiyalarının seçkidə iştirak etməməsi, prosesin legitimliyini şübhə altına almayacaq", - deyə şənbə günü Trend -a müxalif Böyük Quruluş Partiyasının (BQP) sədri, millət vəkili Fazil Qəzənfəroğlu bildirib.
Trend -un arayışı: Azərbaycanda prezident seçkisi oktyabrın 15-də keçiriləcək. İndiyə qədər Müsavat Partityasının başqanı İsa Qəmbərin, Azərbaycan Demokrat Partiyasının sədri Sərdar Cəlaloğlunun, Yaşıllar Partiyasının sədri Mais Güləliyevin, Bütöv Azərbaycan Xalq Cəbhəsi Partiyasının sədri Qüdrət Həsənquliyevin, Müasir Müsavat Partiyasının sədri Hafiz Hacıyevin namizədliyi təmsil olunduqları partiyalar tərəfindən irəli sürülüb. Bundan başqa, "Azərbaycan Naminə" İctimai Forumun rəhbəri Eldar Namazov müstəqil şəkildə namizədliyini irəli sürüb. Hakim Yeni Azərbaycan Partiyası isə hazırki dövlət başçısı İlham Əliyevin namizədliyini irəli sürmək niyyətindədir. İqtiadaryönlü Ana Vətən və Sosial Rifah partiyaları isə seçkidə İlham Əliyevin namiəzdliyini müdafiə etmək qərarı veriblər. Üç müxalifət partiyasının (Azərbaycan Xalq Cəbhəsi, Vətəndaş və İnkişaf, Liberal) təmsil olunduğu "Azadlıq" bloku isə seçkiləri boykot edəcəyi barədə bəyanat verib. Blokun Məclisində bu bəyanat müzakirəyə çıxarılıb, yekun qərar veriləcək.
İyunun 2-də isə Milli Məclisin qərarı ilə Seçki Məcəlləsində bir sıra dəyişikliklər edilib. Seçki kampaniyasının müddəti 120 gündən 75 günə endirilib. 75 günün 28-i təşviqat işlərinə, qalan günlər isə namizədin müəyyən edilməsi, onun qeydə alınması üçün imzaların toplanması, imzaların Mərkəzi Seçki Komissiyası tərəfindən yoxlanması və digər prosedur tədbirlərinə sərf olunacaq. Bundan başqa, namizədin dəstəklənməsi üçün lazım olan imzaların sayı əvvəllər olduğu kimi 45 min yox, 40 min müəyyən edilib, dövlət KİV-də seçki təbliğatı qadağan olunub. Bundan sonra seçkidə iştirak qərarı olan Müsavat və Demokrat partiyaları seçkidə iştirakla bağlı qərarlarını yenidən müzakirə etməyə başlayıblar.
Qəzənfəroğlu bildirib ki, bir sıra partiyaların seçkidə iştirak etməməsi həm də prosesin boykot edilməsinə gətirib çıxarmayacaq. "Amma bəzi təşkilatların prosesə qoşulmaması, müəyyən mənada seçkilərin demokratik atmosferdə keçməsinə təsir göstərəcək", - deyən Qəzənfəroğlu hesab edir ki, seçkinin nəticələrinin bütün siyasi qüvvələr tərəfindən tanınmaması Azərbaycanın imicinə mənfi təsir göstərə bilər. Ona görə də hakimiyyət əlverişli mühit yaratmalıdır ki, müxalifət seçkiyə qatılsın. "Seçkidə iştirakla bağlı məhdudiyyətlər təkcə boykota meylli olan və radikal mövqedə dayanan partiyalar üçün mövcud deyil. BQP kimi konstruktiv mövqedə duran partiyalara da maneələr yaradılır", - deyən BQP sədri onu da bildirib ki, gələn həftə BQP seçkidə iştirak edib-etməməklə bağlı mövqeyini dəqiqləşdirəcək.
Müxalifətyönlü BQP 2004-cü ildə yaradılıb, 2005-ci ildə dövlət qeydiyyatına alınıb. Partiyanın sədri Qəzənfəroğlu Milli Məclisin deputatıdır.
Məqalə müəllifi ilə əlaqə ünvanı: [email protected]
