Bakı. Trend:
Azərbaycan dövləti şəhid jurnalistlərin ailə üzvlərinə daim xüsusi diqqət və qayğı göstərir, onların xatirəsinin yad edilməsi istiqamətində addımlar atılır. Bununla yanaşı ictimai təşkilatlar da bu istiqamətdə müəyyən işlər görür. Bir müddət əvvəl “Bakı Şəbəkəsi” Araşdırmalar və Təhlil İctimai Birliyinin təşkilatçılığı ilə Faransanın paytaxtı Paris şəhərində şəhid jurnalsitlərin xatirəsinə həsr edilən sərgi isə bu mənada xüsusi əhəmiyyət daşıyırdı.
Bu sözləri Trend-ə şəhid jurnalist Məhərrəm İbrahimovun qardaşı Əsgər İbrahimov bildirib.
Şəhid qardaşı əlavə edib ki, belə bir sərginin ilk dəfə, özü də Avropada keçirilməsi şəhidlərimizə göstərilən diqqətlə yanaşı, həm də Azərbaycan həqiqətlərinin dünyaya çatdırılması üçün önəmlidir:
"Ermənistanın Azərbaycana təcavüzü, dinc və mülki şəxslərə, xüsusilə də peşə borcunu yerinə yetirən jurnalsitlərə qarşı müharibə cinayətləri törətməsi, mina terroru və.s kimi məsələlər dünya ictimaiyyətinin diqqətinə çatdırılmalıdır. Biz bu istiqamətdə haqq səsimizi beynəlxalq aləmdə həmişə qaldırmalıyıq. Parisdə təşkil edilən sərgi, həmçinin şəhid jurnalistlərin fotolarından ibarət bukletlərin paylanılması, bu tədbirə avropalı siyasətçilərin, tanınmış və nüfuzlu şəxslərin cəlb edilməsi təqdirəlayiq haldır. Buna görə ailəmiz adından “Bakı Şəbəkəsi” Araşdırmalar və Təhlil İctimai Birliyinə təşəkkür edirik".
Əsgər İbrahimov həmçinin bildirib ki, dövlət tərəfindən bütün şəhidlərə hansı diqqət və qayğı göstərilirsə, Məhərrəmin ailəsi də kənarda qalmır:
“Ailəsinə dövlət tərəfindən ev verilib. Azərbaycan Prezidenti İlham Əliyevin ayırdığı müavinət verilir. Bu yaxınlarda Müdafiə Nazirliyinin ordeni ilə təltif edildi. Mən özüm fərdi olaraq Məhərrəmin adının əbədiləşdirilməsi üçün tədbirlər keçirirəm. Şəhid jurnalistlərin xatirəsinə ənənəvi mini futbol turniri keçirilib. Mən özüm də mətbuat işçisi olduğum üçün həmkar qurumlar tədbirləri işıqlandırırlar. Məhərrəmlə bağlı müəllifi olduğum “Jurnalist ömrünün əbədiyyət nəğməsi” kitabı işıq üzü görüb. Kitabın Mətbuat Şurasında, Respublika Kitabxanasında, Naxçıvan Dövlət Kitabxanasında təqdimatı keçirilib. Yaxın günlərdə belə bir tədbir BDU-da keçiriləcək".
Qeyd edək ki, bu ilin iyul ayında Baku Network (BN) analitik mərkəzi Avropada ilk dəfə olaraq Ermənistanın təcavüzü nəticəsində həlak olan azərbaycanlı jurnalistlər mövzusunu gündəmə gətirərək bir sıra tədbirlər keçirib. Tədbir Parisdə yerləşən Azərbaycan Mədəniyyət Mərkəzində “Azərbaycanın əleyhinə hibrid və ideoloji təhdidlərin təhlili” adlı Baku Network layihəsi çərçivəsində keçirilib. Sərgi Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyi və Azərbaycanın Fransadakı səfirliyinin dəstəyi ilə təşkil olunub. Təşkil olunan sərgi çərçivəsində BN ictimaiyyətə şəhid-jurnalistlərlə bağlı materialları təqdim edib. Tədbir iştirakçılarına şəhid jurnalistlərin xatirəsinə həsr olunmuş bukletlər də paylanılıb. Tədbirdə Fransa ictimaiyyətinin nümayəndələri, fransız və xarici jurnalistlər iştirak ediblər. Bu məsələnin Fransanın paytaxtında müzakirəyə çıxarılması, peşə borcunu yerinə yetirərkən həlak olan azərbaycanlı jurnalistlərin taleyi barədə həqiqətlərin beynəlxalq ictimaiyyətə çatdırılması baxımından mühüm addım olub.
Xatırladaq ki, 2021-ci il iyunun 4-də saat 11.00 radələrində xidməti vəzifələrinin icrası ilə əlaqədar işğaldan azad edilmiş Kəlbəcər rayonuna ezam olunmuş bir qrup jurnalisti aparan “KamAZ” markalı sərnişin avtomobilinin rayonun Susuzluq kəndi istiqamətində hərəkətdə olarkən tank əleyhinə minaya düşməsi nəticəsində üç nəfər - AZƏRTAC-ın müxbiri M.İbrahimov, Azərbaycan Televiziyasının operatoru Sirac Abışov və Kəlbəcər Rayon İcra Hakimiyyəti başçısının Susuzluq kənd inzibati ərazi dairəsi üzrə nümayəndəsinin müavini Arif Əliyev şəhid olublar.
