Azərbaycan, Bakı, 11 iyul / Trend , müxbir S.İlhamqızı, Ü.Sadıqova/ Türkiyənin Baş naziri Rəcəb Tayyib Ərdoğanın İraqa rəsmi səfərində, əsasən,PKK terror təşkilatına qarşı mübarizə məsələsi müzakirə edilib. "Ərdoğanın bu səfəri Türkiyə və İraq rəhbərliklərinin PKK məsələsində bir az da yaxınlaşmasına xidmət edir" - deyə türkiyəli politoloq Mustafa Özcan Trend -a bildirib.
Türkiyənin Baş naziri Rəcəb Tayyib Ərdoğanın rəhbərliyi ilə geniş tərkibli hökumət nümayəndə heyəti cümə axşamı Bagdadda rəsmi səfərdə olub. Bağdadda keçirilən birgə mətbuat konfransında Ərdoğan bildirib ki, PKK terror təşkilatı təkcə Türkiyənin deyil, İraqın da düşmənidir. İraqın Baş naziri Əl-Maliki isə ,PKK-nın adını çəkməyərək deyib ki, bu iki ölkə terrorun hədəfidir.
Türkiyənin İraq üzrə eksperti Özcan hesab edir ki, bu səfər , PKK təşkilatına qarşı mübarizə, neft və digər məsələlərin müzakirəsi baxımından, rəsmi Ankara üçün vacib səfər oldu.
"İraq Türkiyənin ortaqlardan biridir. İraqda olduğu kimi, Türkiyədə də çoxsaylı kürdlər, İraqda isə, türk əsilli əhali yaşayır. İraq rəhbərliyi neft ixracı məsələsində qonşu ölkələrə daha çox üstünlük verəcəyini bildirib, bu ölkələrdən biri də Türkiyədir" - deyə Özcan cümə günü telefonla İstanbuldan bildirib.
O, əlavə edib ki, 2003 - cü ildə İraqın işğalından sonra bölgə dövlətləri İraqa münasibətdə məsafə saxlayıblar. Lakin İran prezidenti Əhmədinejad, sonra İordaniya kralı Abdullah II İraqa səfər etdilər və əlaqələr yaranmağa başladı.
"İraq prezidenti Təlabani deyib ki, Türkiyənin hakim partiyası (AKP) ilə İraq arasında əlaqələr müsbət istiaqmətdə inkşaf edir və AKP iqtidardan gedərsə, bu, ikitərəfli münasibətlərə mənfi təsir göstərə bilər. Bu mənada, Ərdoğanın Bağdada səfəri İraq hakimiyyəti tərəfindən müsbət qarşılandı" - deyə ekspert bildirib.
Özcan xatırladıb ki, ötən ilin noyabr ayından bəri, PKK-ya qarşı mübarizə məsələsində önəmli bir dövr başlandı. Ekspertin fikrincə, istər İraqın şimalında - yəni, əsasən türklər yaşayan bölgədə, istərsə mərkəzində, PKK ilə bağlı Türkiyənin mövqeyinə yaxıqn bir münasibət var.
"Dünən görüş və müzakirələr həm Türkiyə, həm İraq rəhbərliyinin PKK məsələsində fikirlərini yaxınlaşdırmaq üçün daha bir imkan oldu" - deyə Özcan bildirib.
İraqlı politoloq Saleh Kaabi isə, hesab edir ki, İraq əvvəllər PKK-ya qarşı mübarizədə iştirak etməyə çalışırdı.
"İraq hökuməti elan edib ki, PKK-ya qarşı mübarizədə Türkiyəyə kömək etməyə hazırdır" - deyə Kaabi Bağdaddan Trend -a bildirib.
Ekspertin fikrincə, İraq hakimiyyəti bu bəyanatları ilə İraq hökumətinin PKK ilə bağlı mövqeyini təsdiq edir.
Ərdoğan 1990 - cı ildən bəri, Bağdada rəsmi səfər edən ilk Türkiyə Baş naziridir.
Bagdada səfər zamanı Ərdoğan İraqın prezidenti Cəlal Təlabani, iraqlı həmkarı Nuri Əl-Maliki, parlament sədri Mahmud Əl - Meşhadani ilə görüşüb. Tərəflər "Strateji iqtisadi əməkdaşlıq və inteqrasiya haqqında" saziş imzalayıblar.
Məqalə müəllifi ilə əlaqə saxlamaq üçün elektron ünvan [email protected]
