Azərbaycan, Bakı, 17 iyul/ Trend , müxbir E.Babayev/ Azərbaycanın müxalif Müsavat Partiyası prezident seçkisində iştirak edib-etməmək barədə qərar verərkən yalnız partiya maraqlarını nəzərə almayacaq. "Biz yalnız partiya maraqlarını deyil, Azərbaycanın demokratik inkişafı ilə bağlı maraqlarını da nəzərə almaq məcburiyyətindəyik", - cümə axşamı Trend -a Müsavat Məclisinin sədri Sülhəddin Əkbər bildirib.
Trend -un arayışı: Azərbaycanda prezident seçkisinin oktyabrın 15 - də keçirilməsi nəzərdə tutulur. Mərkəzi Seçki Komissiyası bu ayın sonunda seçkiyə rəsmən start verəcək və seçki gününün dəqiq tarixini açıqlayacaq. Müsavatın Məclisi ötən ilin dekabrında partiyanın başqanı İsa Qəmbərin prezidentliyə namizədliyini irəli sürüb. İyunun 2 - də Milli Məclisdə Seçki Məcəlləsinə əlavə və dəyişikliklər qəbul edildikdən sonra, Müsavat seçkidə iştirak qərarına yenidən baxmaqla bağlı müzakirələrə başlayıb.
Müsavat başqanı İsa Qəmbər bəyan edib ki, hazırda partiyada seçkidə iştirakın tərəfdarları, cüzi fərqlə də olsa, üstünlük təşkil edir.
Əkbərin sözlərinə görə, müzakirələr gərgin şəraitdə keçir. Məsələnin mürəkkəbliyi odur ki, ortada yaxşı bir variant yoxdur. "Ortada olan pis və ziyanlı variantların içərisindən ən az ziyanlısını seçməyə çalışırıq"-- deyə Əkbər bildirib. O əlavə edib ki, Müsavat seçki ilə bağlı müzakirələri gələn həftə yekunlaşdırmaq niyyətindədir. "Ola bilsin ki, gələn həftənin birinci günü Müsavatın Divanının iclasında yekun qərar qəbul etməyə yaxınlaşaq. Son qərar isə, avqustun 2-də Məclisdə veriləcək" - deyə o əlavə edib.
Müxalifəti təmsil edən Müsavat Partiyası 1992 - ci ildə yaradılıb. Partiyanın başqanı İsa Qəmbər Azərbaycan parlamentinin spikeri (1992-93-cü illərdə) və 2003-cü ildə keçirilmiş prezident seçkisində prezidentliyə namizəd olub. Partiya beş nəfər deputatla parlamentdə təmsil olunur.
Məqalə müəllifi ilə əlaqə ünvanı: [email protected]