Azərbaycan, Bakı, 21 iyul/ Trend , müxbir C.Babayeva/ Azərbaycanın Milli Qurtuluş Partiyasının (MQP) bazar günü keçirilən qurultayında partiyanın prezident seçkisi ilə bağlı mövqeyi açıqlanıb. "Milli Qurtuluş Partiyası builki prezident seçkisində "Azərbaycan Naminə" İctimai Forumun rəhbəri Eldar Namazovun namizədliyini dəstəkləmək barədə bəyanat qəbul edib", - deyə MQP-nin yeni seçilmiş sədri Vüqar Bəyturan bazar ertəsi Trend -a məlumat verib.
Trend -un arayışı: Vüqar Bəyturan həmçinin səkkiz müxalifət partiyasının təmsil olunduğu "Bizim Azərbaycan" blokunun sədridir. Blok 2003-cü ildə keçirilən prezident seçkisi dövründə prezidentliyə namizəd olan Müsavat Partiyasının başqanı İsa Qəmbərin namizədliyini dəstəkləmək üçün yaradılmışdı. Sonradan Müsavat Partiyası bloku tərk edib. Blokun Sədrlər Şurası builki prezident seçkisində "Azərbaycan Naminə" İctimai Forumun rəhbəri Namazovun namizədliyini dəstəkləyəcəyi barədə bəyanat qəbul edib. Bəyturan sədri olduğu Türk Millətçi Partiyasında tutduğu vəzifədən istefa verib.
Bəyturanın sözlərinə görə, qurultayda partiyanın keçmiş sədri Məhəmməd Hatəmi Tantəkin MQP-nin fəxri sədri seçilib. "Fəxri sədr MQP-nin sədrliyinə mənim namizədliyimi irəli sürüb və qurultay nümayəndələri yekdilliklə mənim namizədliyimi dəstəkləyib", - deyə Bəyturan bildirib.
Onun bildirdiyinə görə, qurultayda MQP-nin nizamnamə və proqramına dəyişikliklər qəbul olunub. "Partiya həmçinin builki prezident seçkisi, 2009-cu il bələdiyyə seçkiləri və 2010-cu il parlament seçkilərində fəal iştirak etmək barədə də qərar qəbul edib", - deyə o bildirib.
Partiyanın "Bizim Azərbaycan" blokunun qərargahında fəaliyyət göstərəcəyini vurğulayan Bəyturan MQP-nin yaxın günlərdə qərargahla təmin olunması üçün Dövlət Əmlakının İdarə Edilməsi üzrə Dövlət Komitəsinə müraciət təqdim edəcəyini bildirib.
Bəyturan sədr vəzifəsindən istefa verdiyi Türk Millətçi Partiyasının prezident seçkisindən sonra qurultay keçirəcəyini bildirib. "Qurultayda partiyanın kollektiv şəkildə Milli Qurtuluş Partiyasına birləşməsi barədə qərar qəbul edəcəyi ehtimalı mövcuddur", - deyə o əlavə edib.
Trend -un arayışı: Milli Qurtuluş Partiyası 1989-cu ildə yaradılıb və 1993-cü ildə dövlət qeydiyyatına alınıb.
Məqalə müəllifi ilə əlaqə saxlamaq üçün ünvan: trend