Azərbaycan, Bakı, 23 iyul/ Trend , G.Əhmədova, E.Tariverdiyeva, T.Cəfərov/ Rəsmi Londonin İrana münasibətdə İsrailin mövqeyini açıq şəkildə dəstəkləməsi İranın nüvə problemində həlledici rol oynamayacaq, belə ki, bu məsələdə İsrailinə əsas tərəfdaşı Vaşinqtondur.
"Qordon Braunun İsrailə səfəri İrana qarşı heç bir tədbirlərə gətirməyəcək; Böyük Britaniya İran məsələsində "əsas oyunçu" deyil", - britaniyalı ekspert Pol Rocers (Paul Rogers) hesab edir.
Britaniyanın Baş naziri Qordon Braun İsrail parlamentində bildirib ki, Böyük Britaniya İranın nüvə silahı əldə etməsinin qarşısını almaq üçün hər bir şeyi edəcək. Braun Knessetin deputatları qarşısında çıxışında İran prezidenti Mahmud Əhmədinejadın İsraili dünya xəritəsindən silmək barədə çağırışlarını kəskin tənqid edib.
Ekspert hesab edir ki, Britaniya və İsrail liderlərinin danışıqları Böyük Britaniyanın İrana dair mövqeyinə düzəlişlər etməsinə baxmayaraq, İrana qarşı "müttəfiqlərin həlledici görüşü" olmayacaq. "Qordon Braunun İsrailə səfərindən sonra, ola bilsin ki, Böyük Britaniyanın mövqeyi daha İsrailyönümlü olacaq, lakin əvvəlki mövqedən o qədər də fərqlənməyəcək", - Beynəlxalq Təhlükəsizlik üzrə Oksford Araşdırma Qrupunun professoru Rocers Londondan elektron poçtla Trend -a bildirib.
İran mənşəli birtaniyalı politoloq Əlirza Nurizadənin (Alireza Nourizadeh) rəyinə görə, İran məsələsi Böyük Britaniyanın İsraillə təkbətək müzakirə edə biləcəyi məsələlərdən deyil. "İsrail nə zamansa İrana hücum edərsə, təbii ki, bu hərəkətlər ilk növbədə ABŞ ilə, sonra isə, ABŞ -ın müttəfiqləri olan Böyük Britaniya və Avropa ölkələri ilə razılaşdırılmalıdır. Hazırda mən belə razılığa səbəb görmürəm", - İran - Ərəb Araşdırmaları Mərkəzinin rəhbəri Nurizadə telefonla Londondan Trend -a bildirib.
Ekspertin sözlərinə görə, Böyük Britaniya İrana qarşı sanksiyaların sərtləşdirilməsinə inanır ki, bundan sonra İran uranın zənginləşdirilməsi proqramından imtina etməlidir.
İsrailli ekspert Menahem Kleyn (Menachem Klein) hesab edir ki, İsrailin siyasəti və İrana qarşı diqqətlə hazırlanmış zərbə Ağ Evlə müzakirə olunan məsələdir. "Lakin mən güman edirəm ki, britaniyalı Baş nazir İsrailin bəzi hərəkətləri barədə məlumatlandırılıb və İranın nüvə proqramı layihəsini beynəlxalq və iqtisadi təzyiq faktı qarşısında qoymaq üçün İsrail və Ağ Evdən yardım istəyib", - İsraildəki Bar-İlan Universitetinin professoru Kleyn elektron poçtla Trend -a bildirib.
Onun sözlərinə görə, Braunun səfəri İsraildəki ictimai rəyə və ya İsrail hökumətinin rəyinə təsir etməyib. "Həm ictimaiyyət, həm də hökumət Olmertin qalmaqalları, siyasi böhran, yeni hökumət Kabinetinin yaradılması, həmçinin, Obamanın səfəri ilə məşğuldur", - o bildirib.
İsrailə təzyiq alətlərindən birinə çevrilən İran problematikasından danışan amerikalı ekspert Frensis Boyl (Francis Boyle) hesab edir ki, Böyük Brtaniya iştirakçısı olduğu "1948 - ci il soyqırımı Konvensiyası"na biganə qalmamalıdır.
"Braunbu Konvesiyanı pozaraq, Qəzzə zolağında yaşayan 1,5 milyon fələstinliyə qarşı soyqırım siyasəti həyata keçirən İsraili dəstəkləmək qərarına gəlib", - İllinoys və Harvard Universitetlərinin beynəlxalq hüquq professoru Boyl elektron poçtla Trend -a bildirib.
Onun sözlərinə görə, Braun Konvesiyaya riayət etmək əvəzinə, mövcud olmayan nüvə proqramı ilə əlaqədar İranı təhdid edir ki, bu Proqram yalnız Beynəlxalq Atom Energetikası Agentliyi tərəfindən öz təsdqini tapıb. "Bu, MAQATE-nin İraqın nüvə silahına malik olmadığını bəyan edərkən, Toni Bleyerin bu ölkəyə qarşı etdiyinin eynidir. Dünya əbəs yerə Böyük Britaniyanı xain adlandırmır", - Boyl bildirib.
İsrailli ekspert Kleyn hesab edir ki, bir çoxlarının rəyinə görə, Fələstinə himayəçilik edən İran "ikili standartlara" əməl edir. "İran İsrailin fələstinlilərə hücumuna heç zaman hər hansı bir reaksiya göstərməyib. Fələstin dövlət deyil və buna görə də, İranın Fələstini dəstəkləməsi deklarativ himayədir", - Kleyn bildirb.
Britaniyalı Baş nazirin Yaxın Şərqə rəsmi üçgünlük səfəri çərşənbə axşamı başa çatıb. Braun tarixdə İsrail parlamenti deputatları qarşısında çıxış edən ilk britaniyalı Baş nazir olub.
Müəlliflə əlaqə saxlamaq üçün elektron ünvan - [email protected]
