Azərbaycan, Bakı, 24 iyul/ Trend , müxbir E.Babayev/ Azərbaycanın Avropa Şurası Parlament Assambleyasındakı (AŞ PA) nümayəndə heyəti "Alternativ xidmət haqqında" qanun layihəsinin qəbul olunmasının əleyhinədir. "Bu qanun ümumiyyətlə, Milli Məclisdə müzakirə olunmamalıdır. Əgər bəzi millət vəkilləri qanunun qəbulunda israrlı olsalar, qanunun qüvvəyə minməsi ilə bağlı şərt qoyulacaq, yəni Azərbaycan əraziləri işğaldan azad olunana qədər alternativ xidmət tətbiq oluna bilməz", cümə axşamı Trend -a Azərbaycanın AŞ PA-dakı nümayəndə heyətinin üzvü, millət vəkili Gültəkin Hacıyeva bildirib.
Trend -un arayışı: Azərbaycan 2001-ci ildə Avropa Şurasına qəbul edilərkən üzərinə bir sıra öhdəliklər götürüb. Bunlardan biri də "Alternativ xidmət haqqında" qanunun qəbul edilməsidir. Hazırda parlamentdə qanun layihəsinin hazırlanması üzərində iş gedir.
Hacıyeva deyib ki, Azərbaycan qanunvericilik sahəsində Avropa Şurası qarşısında götürdüyü öhdəlikləri yerinə yetirib, yalnız "Alternativ xidmət haqqında" qanun layihəsi qalıb. "Bunun da obyektiv səbəbləri var. Azərbaycan ərazilərinin 20 faizi işğal altındadır. Belə bir ölkədə hərbdən yayınmağa imkan yaradan qanunun qəbul olunmasına ehtiyac yoxdur", - deyə Hacıyeva bildirib.
Ermənistan Azərbaycan ərazisinin 20 faizini - Dağlıq Qarabağı və ətrafındakı yeddi rayonu işğal edib. İşğal 1988-ci ildən başlayıb, 1991-ci ilin dekabrınadək Şuşa və Xocalı istisna olmaqla Dağlıq Qarabağ Azərbaycanın nəzarətindən çıxıb. 1992-93-cü illərdə isə Şuşa, Xocalı və Dağlıq Qarabağın ətrafındakı daha yeddi rayon işğal edilib. 1994-cü ildə Ermənistanla Azərbaycan arasında atəşkəs haqqında razılıq əldə olunub və indiyədək də tərəflər arasında sülh danışıqları davam etdirilir.
Dağlıq Qarabağ münaqişəsinin sülh yolu ilə tənzimlənməsi üçün üç ölkə - ABŞ, Rusiya və Fransa təmsilçilərinin həmsədrliyi ilə ATƏT-in Minsk Qrupu vasitəçilik edir.
Məqalə müəllifi ilə əlaqə ünvanı: [email protected]