Azərbaycan, Bakı, 29 iyul/ Trend , müxbir E.Babayev/ Müxalif Azərbaycan Milli İstiqlal Partiyasının (AMİP) lideri Etibar Məmmədov prezident seçkisində iştirak etməyəcək. "Mənim prezident seçkisində iştirakım gözlənilmir", - deyə çərşənbə axşamı Trend -a AMİP lideri Etibar Məmmdov bildirib.
Trend -un arayışı: Azərbaycanda prezident seçkisi oktyabrın 15 - də keçiriləcək. İndiyə qədər Müsavat Partityasının başqanı İsa Qəmbərin, Azərbaycan Demokrat Partiyasının sədri Sərdar Cəlaloğlunun, Yaşıllar Partiyasının sədri Mais Güləliyevin, Bütöv Azərbaycan Xalq Cəbhəsi Partiyasının sədri Qüdrət Həsənquliyevin, Müasir Müsavat Partiyasının sədri Hafiz Hacıyevin namizədliyi təmsil olunduqları partiyalar tərəfindən irəli sürülüb. Bundan başqa, "Azərbaycan Naminə" İctimai Forumun rəhbəri Eldar Namazov müstəqil şəkildə namizədliyini irəli sürüb. Hakim Yeni Azərbaycan Partiyası hazırki dövlət başçısı İlham Əliyevin namizədliyini irəli sürmək niyyətindədir. Üç müxalifət partiyasının (Azərbaycan Xalq Cəbhəsi, Vətəndaş və İnkişaf, Liberal) təmsil olunduğu "Azadlıq" bloku isə, seçkiləri boykot edəcəyi barədə qərar verib.
Məmmədov bildirib ki, AMİP-in başqa bir namizədlə seçkiyə qoşulmasını istisna etmək olmaz. " Partiya başqa bir namizəd irəli sürsə, mən onu müdafiə edəcəyəm" - deyən Məmmədov özünün seçkilərə hansı səbəbdən qoşulmayacağına şərh vermək istəməyib.
AMİP-in sədr müavini Əli Orucov Trend -a bildirib ki, AMİP qarşıdan gələn prezident seçkisini boykot etməyəcək. "Biz seçkidə iştirak etmək niyyətdindəyik və partiyada əksəriyyət seçkiyə qoşulmağımızın tərəfdarıdır" - deyən Orucovun sözlərinə görə, AMİP seçkiqabağı mühitdən narazı olsa da, seçkidə iştiraka üstünlük verir. "Seçkidə hansı formada iştirakla bağlı partiyada bir neçə variant var. Bunlardan biri odur ki, AMİP-in lideri Etibar Məmmədovun namizədliyi irəli sürülsün. Bu olmayacağı təqdirdə, partiyadan başqa bir namizəd verilə bilər. Bunlar baş tutmayacağı təqdirdə isə, başqa bir partiyanın namizədini müdafiə edə bilərik. İstənilən halda, biz boykotun əleyhinəyik" - deyən Orucov partiyanın qərarının yaxın vaxtlarda məlum olacağını deyib. Bunun üçün AMİP-in Siyasi Şurasının iclası keçiriləcək və son qərar veriləcək.
AMİP 1992 - ci ildə yaradılan və Azərbaycanda ilk dövlət qeydiyyatına alınan partiyadır. Müxalifəti təmsil edən AMİP-in qurucusu və 2004 - cü ilin sonunadək sədri olan Etibar Məmmədov hazırda Beynəlxalq Demokrat İttifaqının (BDİ) sədr müavinidir.
Məqalə müəllifi ilə əlaqə ünvanı: [email protected]
