Azərbaycan, Bakı, 29 iyul/ Trend , müxbir E.Babayev/ Üç müxalifət partiyasının (Xalq Cəbhəsi, Liberal, Vətəndaş və İnkişaf) təmsil olunduğu "Azadlıq" bloku qarşıdan gələn prezident seçkisini müşahidə etmək niyyətindədir. "Bu məsələ blokun Sədrlər Şurasında müzakirə olunacaq. Seçkini müşahidə etməklə bağlı qərarımız olsa, bütün seçki məntəqələrinə müşahidəçi göndərmək imkanımız var", - çərşənbə axşamı Trend -a Vətəndaş və İnkişaf Partiyasının (VİP) sədri Əli Əliyev bildirib.
Azərbaycanda prezident seçkisi oktyabrın 15 - də keçiriləcək. "Azadlıq" bloku seçkini boykot etmək barədə qərar verib.
Əliyev bildirib ki, əslində, bu qərar seçkilərin bütün mərhələsinə verilən qiymətdir. "Bu baxımdan, mənim şəxsi qənaətim odur ki, seçkini müşahidə etməyə ehtiyac yoxdur. Lakin bu məsələ Sədrlər Şurasında müzakirə ediləcək. Yekun qərar nə olsa, həmin qərara uyğun hərəkət edəcəyik" - deyən Əliyev vurğulayıb ki, blok özünün boykot qərarının cəmiyyətə çatdırılması üçün müəyyən mübarizə vasitələrindən də istifadə edəcək.
Vətəndaş və İnkişaf Partiyası 2006 - cı ildə təsis olunub. Həmin vaxta qədər bu partiyanın üzvləri Azərbayan Milli İstiqlal Partiyasında (AMİP) təmsil olunublar. AMİP- də baş vermiş parçalanma nəticəsində, Əli Əliyevin tərəfdarlı öz qurultaylarını keçirərək, VİP-i təsis ediblər. VİP "Azadlıq" siyasi blokunun üzvüdür.
Məqalə müəllifi ilə əlaqə ünvanı: [email protected]
