Azərbaycan, Bakı, 29 iyul/ Trend , müxbir C.Babayeva/ ATƏT- in hazırki sədrinin xüsusi nümayəndəsi Heyki Talvitiyenin çərşənbə axşamı Azərbaycanın siyasi partiyalarının nümayəndələri ilə görüşündə müxalifət partiyaları prezident seçkisinin dayandırılması təklifi ilə çıxış ediblər. Bu barədə çərşənbə axşamı Trend -a görüşdə iştirak etmiş Azərbaycan Liberal Partiyasının sədri Əvəz Təmirxan məlumat verib.
Azərbaycanın Mərkəzi Seçki Komissiyası prezident seçkisinin oktyabrın 15- nə təyin olunduğunu bildirib.
"ATƏT nümayəndəsindən yeni demokratik seçki məcəlləsinin qəbul olunması və müxalifətin də seçkidə iştirakı təmin olunması tələb olunub",- deyə Təmirxan bildirib.
Təmirxan görüşdə iştirak edən müxalifət partiya nümayəndələri tərəfindən bir sıra beynəlxalq təşkilatların, həmçinin, ATƏT-in Azərbaycanda demokratiyaya münasibəti kəskin tənqid olunduğunu bildirib. "ATƏT üzərinə düşən missiyanı yerinə yetirmək istəmir. Azərbaycanda yaranmış vəziyyətə görə məsuliyyət yalnız iqtidarın üzərinə deyil, beynəlxalq təşkilatların, o cümlədən ATƏT-in üzərinə düşür",- deyə partiya sədri bildirib.
Təmirxanın sözlərinə görə, görüşdə Dağlıq Qarabağla bağlı müzakirələrdə ATƏT-in Minsk Qrupunun fəaliyyəti kəskin tənqid olunub. "Minsk Qrupu təcavüzkarla təcavüzə məruz qalanı eyni müstəviyə qoyur",- deyə o bildirib.
Təmirxan görüşdə Ermənistandan deportasiya olunan azərbaycanlıların məsələsini qaldırdığını bildirib və onların hüquqlarının Ermənistan tərəfindən bərpa olunmasını tələb edib.
ALP sədri görüşdən narazı qaldığını bildirib. "ATƏT nümayəndəsi yeni təkliflə gəlməmişdi. O, heç bir təklif verməyərək, müxalifətlə növbəti görüşünü keçirdi", - deyə Təmirxan bildirib.
Görüşdə iştirak etmiş Azərbaycan Demokrat Partiyasının sədri Sərdar Cəlaloğlu görüşlə bağlı Trend -a məlumat verməkdən imtina edib. Onun sözlərinə görə, ATƏT nümayəndəsi görüş iştirakçılarından müzakirələrlə bağlı mətbuata məlumat verilməməsini xahiş edib. O, yalnız görüşdə "Azərbaycan Naminə" İctimai Forumun rəhbəri Eldar Namazov, Müsavat partiyası İcra Aparatının rəhbəri Arif Hacılı, AXCP sədri Əli Kərimli, Liberal Partiyanın sədri Əvəz Təmirxan, Ümid partiyasının sədri İqbal Ağazadə, Bütöv Azərbaycan Xalq Cəbhəsi Partiyasının sədri Qüdrət Həsənquliyev, Demokratik İslahatlar Partiyasının sədri Asim Mollazadə və Yeni Azərbaycan Partiyasının icra katibinin müavini Mübariz Qurbanlının iştirak etdiyini bildirib.
Məqalə müəllifi ilə əlaqə saxlamaq üçün ünvan: [email protected]
