...

Azərbaycanın İctimai Televiziyası prezidentliyə namizədlərə pullu efir vaxtı ayırmaq niyyətindədir

Siyasət Materials 11 Avqust 2008 15:34 (UTC +04:00)

Trend-i buradan izləyin

Azərbaycan, Bakı, 11 avqust / Trend , müxbir E.Babayev/ Azərbaycanın İctimai Televiziyası (İTV) efirində prezidentliyə namizədlərə pulsuz efir vaxtı ilə yanaşı, pullu efir vaxtı da ayırmaq niyyətindədir.

"İctimai Televiziyanın pullu efir vaxtı da olacaq. Bu zaman namizədlərin maddi durumu həqiqətən imkan verməsə, biz təbii ki, seçkidə daha yüksək fəallığın olması üçün onların vəziyyətini nəzərə alacağıq", bazar ertəsi Trend -a İTV-nin baş direktoru İsmayıl Ömərov bildirib.

Trend -un arayışı: Azərbaycanda prezident seçkiləri oktyabrın 15-də keçiriləcək. Bu il iyunun 2-də Milli Məclisdə Seçki Məcəlləsinə edilən dəyişikliklər nəticəsində namizədlərə ayrılacaq pulsuz efir vaxtını yayımlamaq hüququ dövlət televiziyasından (AzTV) alınaraq İTV-yə verilib.

Ömərov bildirib ki, pullu efir vaxtının qiyməti və başqa bu kimi məsələlər hələ məlum deyil.

"Seçki öncəsi pullu efir vaxtını qiymətləndirmək üçün özəl televiziya şirkətlərinin rəhbərləri bir yerə yığışır və Milli Televiziya və Radio Şurasının sədrliyi ilə qərara alınır ki, ümumiyyətlə, bu vəziyyətdən sui -istifadə olunmasın. Birlikdə vaxtın hansı şəkildə qiymətləndirilməsi qərara alınır. Efir vaxtı qiymətləndiriləndən sonra elan verilir", - deyən Ömərov vurğulayıb ki, pulsuz efir vaxtı prezidentliyə namizədlər rəsmən qeydə alındıqdan sonra məlum olacaq.

"Bütün namizədlərin iştirakı ilə püşkatma həyata keçiriləcək. Onlar ixtiyarlarında olacaq efir vaxtından hansı formada istifadə edəcəkləri barədə özləri qərara gəlməlidirlər. Yəni ayrılan vaxtın neçə dəqiqəsinin ayrı-ayrı çıxışlara, neçə dəqiqəsinin debatlara həsr olunması məsələsi ilə bağlı qərar verəcəklər. Bu prosesdə Mərkəzi Seçki Komissiyası da iştirak edəcək. Onlar birlikdə, hər həftə ayrılacaq ən azı 3 saatlıq efir vaxtının necə bölünməsi ilə bağlı razılığa gələcəklər. Bu məsələ namizədlərin özlərinin istəyi ilə həll olunacaq. Biz burada icraçıyıq və elə bir rolumuz yoxdur", - deyə o əlavə edib.

Ömərov onu da bildirib ki, İTV seçkidə bitərəfliyini qoruyub saxlayacaq. "Bütün namizədlərə eyni şərait yaradacağıq. Heç bir tərəfin hüququnu pozmayacağıq və tam qanun çərçivəsində, beynəlxalq standartlara uyğun yüksək səviyyəli verilişlər yayımlayacağıq", - deyə o qeyd edib.

Məqalə müəllifi ilə əlaqə ünvanı: [email protected]

Xəbər lenti

Xəbər lenti