Azərbaycan, Gəncə, 12 avqust / Trend , V. Məmmədov/ Azərbaycanın qərbində yerləşən Gəncə şəhərində (paytaxt Bakıdan 365 kilometr kənarda) qaz borularına qanunsuz müdaxilələrə görə 25 abonentin işi hüquq-mühafizə orqanlarına təqdim olunub.
"Bu il Gəncədə 64 qaz abonenti borulara müdaxilə etdiyinə görə cərimələnib. Cərimələnənlərin 39 nəfərindən 4 066 manat məbləğində vəsait büdcəyə köçürülüb. 25 nəfər isə cərimələri ödəməkdən imtina etdiyiynə görə, onların sənədləri hüquq-mühafizə orqanlarına göndərilib" - Trend -a Gəncə şəhər Qaz İstismarı İdarəsinin rəis müavini Ağəli Abdullayev bildirib.
Onun sözlərinə görə, ötən ay Gəncədə qaz pullarının yığımı 90,1 faiz təşkil edib. Bu isə ötən ilin eyni dövrü ilə müqayisədə təxminən iki dəfə çoxdur.
Abdullayev deyib ki, Gəncədə smart kart tipli sayğacların quraşdırılması da sürətlə davam etdirilir. 29 min abonent artıq bu tip sayğaclarla təmin olunub. İlin sonunadək 69 min abonentin hamısının elektron tipli sayğaclarla təmin edilməsi planlaşıdırılır.
Məqalə müəllifi ilə əlaqə ünvanı: [email protected]
