Azərbaycan, Bakı, 13 avqust / Trend , müxbir E.Babayev/ Azərbaycanın Milli Qeyri - Hökumət Təşkilatları Forumu (MQF) Azərbaycanda keçiriləcək prezident seçkiləri ilə bağlı tədbirlər planı hazırlayıb. "MQF seçkilərin daha demokratik keçirilməsi və seçici fəallığının artırılması üçün tədbirlər həyata keçirəcək",- çərşənbə günü Trend -a MQF prezidenti Rauf Zeyni bildirib.
Azərbaycanda prezident seçkisi oktyabrın 15 - də keçiriləcək. İndiyə qədər prezidentliyə 12 iddialı seçkidə iştirak etmək üçün sənədlərini Mərkəzi Seçki Komissiyasına təqdim edib.
Zeyninin sözlərinə görə, MQF seçki ilə bağlı müəyyən treninqlər də təşkil edəcək. Treninqlər, əsasən, seçkini müşahidə edəcək şəxslər üçün təşkil olunacaq. "Biz MQF olaraq, seçkidə "exit-poll" keçirməyəcəyik. Ancaq ehtiyac olarsa, "exit-poll" keçirəcək digər QHT-lərə köməklik göstərəcəyik" deyə o bildirib. Zeyni onu da qeyd edib ki, MQF seçki ilə bağlı planlarını təkcə paytaxt Bakıda deyil, regionlarda da həyata keçirəcək.
MQF-də 500-dək QHT təmsil olunur.
Məqalə müəllifi ilə əlaqə ünvanı: [email protected]
