Azərbaycan, Bakı, 29 avqust / Trend , müxbir D.Xatınoğlu/ Narkotik maddələr üzrə beynəlxalq hesabatın tərtibi ilə məşğul olan Senlis Şurası Əfqanıstanın Narkotik Maddələrlə Mübarizə Nazirliyinin BMT ilə birgə hazırladığı, bu ölkənin 2008-ci il üzrə narkotiklərlə əlaqədar hesabatını saxtalaşdırılmış və yalan adlandırıb. Lakin Narkotik Maddələrlə Mübarizə Nazirliyinin sözçüsü Zulmay Əfzali Trend -a bildirib ki, əksinə, Senlis Şurasının hesabatı ağ yalandır və Əfqanıstan narkotiklərlə mübarizədə böyük uğurlar qazanıb.
Narkotik maddələrlə bağlı beynəlxalq fəaliyyət göstərən Senlis Şurası BMT və Əfqanıstanın Narkotik Maddələrlə Mübarizə Nazirliyinin birgə hazırladığı hesabatındakı faktların şübhə doğurduğunu bildirib. Avqustun 28-də Senlis Şurasının rəsmi saytında dərc olunub ki, Əfqanıstanda 2007-ci ildə 7700 ton tiryək istehsal olunub, cari ildə isə bu rəqəm 8200 tona çatıb. Həftənin əvvəlində Əfqanıstanın Narkotik Maddələrlə Mübarizə Nazirliyinin BMT ilə birgə yaydığı hesabatda isə qeyd olunub ki, 2007-ci il ilə müqayisədə cari ildə narkotik maddələrin ölkədə istehsalı 6% azalıb.
Əfzali bildirib ki, Senlis Şurasının Əfqanıstan daxilində fəaliyyətinə icazə yoxdur və onlar Əfqanıstanla bağlı qərəzli şəkildə yanlış hesabat yayırlar. Belə ki, Senlis Şurası özünün bu hərəkəti ilə dünyada qalmaqal və narahatlıq yaratmaqla, imic qazanmaq və bu yolla da Şuranın Əfqanıstanda fəaliyyətinin vacibliyini göstərmək istəyir. "Onlar beynəlxalq təşkilatlardan maliyyə vəsaitləri almaqdan başqa heç bir şey düşünmürlər", - deyə əfqan rəsmisi bildirib.
Əfqanıstan Konstitusiyasının 7-ci maddəsinə əsasən, narkotik maddələrin istehsalı, satışı və qaçaqmalçılığı qadağandır.
Əfzali bildirib ki, narkotik bitki sayılan xaşxaşın əkilməsi keçən il ilə müqayisədə 11.3 faiz azalıb. "Biz dəfələrlə Əfqanıstanın müxtəlif regionlarına səfər edib, camaatla, din xadimləri və yerli orqanlarla söhbətlər aparmışıq. Ölkənin 18 vilayətində narkotik maddələrin əkilməsinin qarşısı tamamilə alınıb", - deyə Əfzali cümə axşamı telefonla Kabildən bildirib.
Onun sözlərinə görə, Əfqanıstanda narkotiklərlə mübarizə istiqamətində daha ciddi addımlar atılacaq.
BMT-nin 2007-ci ildə yaydığı məruzədə bildirilib ki, dünya üzrə istehsal olunan tiryəkin 92, heroinin isə 93%-i Əfqanıstanın payına düşür. BMT-nin statistikalarına əsasən, keçən il Əfqanıstanda 8200 ton tiryək istehsal olunub.
Müəlliflə əlaqə ünvanı: trend