Azərbaycan, Bakı, 10 sentyabr / Trend , müxbir C.Babayeva/ Azərbaycanın müxalif Klassik Xalq Cəbhəsi Partiyası (KXCP) bəzi müxalifət partiyalarının birgə bəyanatına qoşulan siyasi təşkilatların sayının artırılacağını təqdirəlayiq hesab edib. KXCP Ali Məclisinin sədri Zəlimxan Məmmədlinin çərşənbə günü Trend -a verdiyi məlumata görə, bununla bağlı partiyanın İdarə Heyətinin toplantısında bəyanat qəbul olunub.
Məmmədli bildirib ki, KXCP-nin müxalifət partiyalarının bəyanatına qoşulub-qoşulmayacağına yaxın günlərdə aydınlıq gətiriləcək.
Trend -un arayışı: Ötən həftə "Azadlıq" blokuna daxil olan partiyalar - Xalq Cəbhəsi, Liberal Partiya, Vətəndaş və İnkişaf Partiyası, Müsavat və "Azərbaycan Naminə" İctimai Forum seçkini qanunsuz tanımaq barədə birgə bəyanat imzalayıblar. Bəyanatda prezident seçkisindən sonra formalaşacaq hakimiyyət qeyri-legitim elan edilib. KXCP-nin də bu bəyanata qoşulması ilə bağlı partiya ilə müzakirələr aparılsa da, partiya sədri Mirmahmud Mirəlioğlu sənədə imza atmayıb. O, sənədə qoşulmaması səbəbini Demokratiya Uğrunda İttifaqda təmsil olunduğu müttəfiqlərinin (Azadlıq, Milli-Demokrat, Böyük Azərbaycan partiyaları) həmin bəyanata qoşulmasına razılığın verilməməsi ilə izah edib. KXCP Ali Məclisinin sədri Məmmədli Mirəlioğlunun bəyanata qoşulmamaq barədə qəbul etdiyi qərarı düzgün hesab etməyib.
Trend -un arayışı: Klassik Xalq Cəbhəsi Partiyasının təsis qurultayı 2006-cı ilin mart ayında keçirilib. Həmin vaxta qədər partiya Azərbaycan Xalq Cəbhəsi Partiyası adına iddia edirdi və "Klassiklər" AXCP-si kimi tanınırdı. Azərbaycanın eks-prezidenti, AXCP-nin sədri Əbülfəz Elçibəyin müavini olmuş Mirəlioğlu 2000-ci ildə partiyanın iki yerə parçalanmasından sonra "Klassiklər" qanadına sədrlik edib. 2006-cı ildə partiyanın adında dəyişiklik edilərək KXCP adlandırılıb.
Məqalə müəllifi ilə əlaqə saxlamaq üçün ünvan: trend
