...

Azərbaycanda yeni yaranacaq müxalifət partiyası təsis qurultayına hazırlaşır

Siyasət Materials 20 Oktyabr 2008 13:01 (UTC +04:00)

Azərbaycan, Bakı, 20 oktyabr / Trend , müxbir A.Hüseynbala / Azərbaycanda yeni yaranacaq müxalif Aydınlar Partiyasının təsis qurultayının noyabr ayının sonlarında keçirilməsi nəzərdə tutulur. Yeni yaranacaq partiyanın Təşəbbüs Qrupunun üzvü, prezidentliyə keçmiş müstəqil namizəd Qulahüseyn Əlibəyli bazar ertəsi Trend -a deyib ki, indi 20-yə yaxın rayonda yerli şöbələrin yaradılması prosesi gedir.

Trend - un arayışı : Qulamhüseyn Əlibəyli 1992-1993-cü ildə prezident Elçibəyin müşaviri və parlamentdə rəsmi nümayəndəsi olub. 1995-ci ildən 2005-ci ilədək iki dəfə ardıcıl olaraq Milli Məclisin deputatı olub. Avropa Şurası Parlament Assambleyasında Azərbaycan nümayəndə heyətinin üzvü olub. O, 1989-cu ildən AXC-nin üzvü, 1993-cü ildən isə AXCP Ali Məclisinin sədri idi. Avqustun əvvəllərində AXCP Ali Məclisinin sədri vəzifəsindən istefa verib, sentyabrın sonunda yeni Aydınlar Partiyası yaradacağını bəyan edib. AXCP üzvü Nizami Quliyev partiyadan istefa verərək Aydınlar Partiyasının sıralarına qoşulacağı barədə bildirib.

AXCP-nin Lənkəran, Samux və Qax rayon şöbələrinin sədrləri oktyabrın əvvəllərində istefa verərək Əlibəylinin seçki qərargahına qoşularaq, siyasi fəaliyyətlərini Aydınlar Partiyasında davam etdirəcəklərini açıqlayıblar.

Əlibəylinin sözlərinə görə, qanunvericilikdə yeni yaranan partiyanın təsis qurultaynın keçirilməsi üçün ən azı min nəfər üzvün olması tələb edilir.

"İndi Təşəbbüs Qrupunun qarşısında duran əsas məsələ yeni yaradacağımız Aydınlar Partiyasının regionlarda yerli qurumlarını yaratmaqdır. Biz çalışacağıq ki, qurultaya qədər ən azı 35 rayonda yerli şöbələr formalaşsın. Bundan sonra nümayəndələr seçiləcək. Bu prosesi isə noyabrın axırına qədər başa çatdırmağı nəzərdə tuturuq", - Təşəbbüs Qrupunun üzvü deyib.

Məqalə müəllifi ilə əlaqə ünvanı: [email protected]

Xəbər lenti

Xəbər lenti