Azərbaycan, Lənkəran, 22 oktyabr / Trend , müxbir P.Əliyeva/ Azərbaycanın cənubunda yerləşən (paytaxt Bakıdan 320 km məsafədə) yerləşən Astara rayonunda narkotik vasitələrin satışı ilə məşğul olan rayon sakini saxlanılıb.
Rayon polis şöbəsinin əməkdaşlarının keçirdiy axtarış-əməliyyat tədbirləri nəticəsində oktyabrın 20-də saat 20:00 radələrində Astaranın Sərək kənd sakini 1961-ci il təvəlüdlü Məmmədov Cavanşir Ağahəsən oğlu narkotik maddə satarkən yaxalanıb.
Astara rayon polis şöbəsinin rəis müavini Arzu Hacıyevin verdiyi məlumata görə, Astara rayon sakinlərindən bir qrupu Məmmədovun narkotik vasitələrin qanunsuz satışı ilə məşğul olması barədə polisə məlumat verib.
Məlum olub ki, Məmmədov narkotik vasitələrin satışı üçün müştəri axtarıb. Aparılmış əməliyyat nəticəsində Məmmədov şərti alıcya 1 kq həşişi 2500 dollara satarkən yaxalanıb. Onun üzərində 4 kq 200 qram həşiş olub.
Faktla bağlı qanunsuz olaraq narkotik vasitələri, psixotrop maddələri və ya prekursorları hazırlama, istehsal etmə, əldə etmə, saxlama, daşıma, göndərmə və ya satma (234. 4.3) maddəsi ilə cinayət işi başlanılıb, istintaq aparılır.
Məqalə müəllifi ilə əlaqə ünvanı: [email protected]
