Azərbaycan, Bakı, 18 dekabr/ Trend , müxbir R.Novruzov/ Yanvar iclasınadək ölkədə demokratiyanın səviyyəsinə yaxşılaşma olmasa, Ermənistanı Avropa Şurasında (AŞ) səs hüququndan məhrum edəcəklər.
"Vəziyyəti yerində müşahidə etmək üçün Ermənistana monitorinq qrupu göndəriblər. Yaxşılaşma olmazsa, səs hüququndan məhrum edilmək haqqında qərar artıq yanvarda qəbul ediləcək", - AŞPA -nın məruzəçisi Andreas Herkel cümə axşamı Trend -a bildirib.
Herkelin sözlərinə görə, AŞPA Nazirlər Komitəsinin çərşənbə günü Strasburqda keçirilən sonuncu iclasında Ermənistana qarşı sanksiyalar məsələsi xüsusilə kəskin şəkildə qoyulub. AŞ-də səs hüququndan məhrum edilmək haqqında sanksiya imzalansa da, Ermənistana AŞPA-nın yanvar sessiyasınadək vəziyyəti yaxşılaşdırmaq imkanı vermək qərara alınıb.
Herkelin sözlərinə görə, Ermənistan üçün ən böyük problem mart iğtişaşları zamanı hüquq-mühafizə orqanlarının güc tətbiq etməsi və bəzi iğtişaş iştirakçılarının həbs edilməsi faktıdır. 2008 -ci ilin martında Ermənistanda prezident seçkilərindən sonra hakimiyyət və seçkilərin nəticəsindən narazı müxalifət arasında ciddi toqquşmalar olub.
Ermənistanda prezident seçkiləri 2008-ci il fevralın19-da keçirilib. Mərkəzi Seçki Komissiyasının məlumatına görə, hakimiyyətin namizədi, Ermənistanın keçmiş Baş naziri Serj Sərkisyan 52 faiz səs toplayaraq seçkilərdə qələbə qazanıb. Müxalifətdən prezidentliyə namizəd Levon Ter-Petrosyan seçkilərin saxtalaşdırıldığını bəyan edib. Buna etiraz edən Ter-Petrosyan tərəfdarları bir neçə gün etiraz aksiyası keçiriblər.
Ermənistan polisi martın 1-dən 2-nə keçən gecə müxalifətin mitinqini dağıdan zaman toqquşmalar baş verib. Nəticədə 131 nəfər xəsarət alıb, onlardan səkkizi güllə yaralarından ölüb.
AŞPA-nın bəzi məruzəçiləri sonuncu görüş zamanı Ermənistanın təşkilatın Qətnamələrini pozmasına hədsiz yumşaq münasibəti tənqid ediblər. "Mən şəxsən AŞPA-nın Ermənistana qarşı bu yumşaqlığına etirazımı bildirmişəm", - Herkel deyib.
Əvvəllər AŞPA Ermənistanla bağlı 1609 və 1620 saylı Qətnamələr qəbul edib. Qətnamələrdə siyasi məhbusların azad edilməsi, baş verən hadisələrin obyektiv təhqiqi, dinc aksiya iştirakçılarına qarşı güc əsassız olaraq tətbiq etmiş hüquq - mühafizə orqanları əməkdaşlarının cəzalandırılması və digər məsələlər öz əksini tapıb.
Müəlliflə əlaqə saxlamaq üçün elektron ünvan: [email protected]
