Azərbaycan, Bakı, 24 dekabr / Trend , müxbir S.Kazımlı/ Bakıda baş vermiş qətl hadisəsinin üstü açılıb. Polis əməkdaşları apardıqları araşdırma zamanı bir neçə gün əvvəl paytaxtda qətl hadisəsi törətmiş şəxsin daha bir qətllə bağlılığı aşkar edilib, - çərşənbə günü Sabunçu rayon Polis İdarəsinin 12-ci polis bölməsindən Trend - a məlumat verilib.
Polis bölməsindən bildiriblər ki, polis əməkdaşları tərəfindən bir neçə gün əvvəl Xətai rayonunda Rafiq Əliyevi bıçaqla qətlə yetirmiş İqor Bazilevski ilə bağlı aparılan əməliyyat tədbirləri nəticəsində, çərşənbə günü müəyyən olunub ki, Sabunçu rayonu ərazisində baş vermiş daha bir qətl hadisəsində də onun əli var.
Dekabrın 16- da Xətai rayonundakı Naximov küçəsində yaşayan Rafiq Əliyevin bıçaqla qətlə yetirilmiş meyiti evində tapılıb. Bakı şəhər Baş Polis İdarəsinin Cinayət - Axtarış İdarəsi və Xətai rayon Polis İdarəsinin əməkdaşlarının birgə keçirdikləri əməliyyat - axtarış tədbirləri nəticəsində, qətli törətmiş Bakı şəhər sakinləri İqor Bazilevski və Anar Nuriyev dekabrın 18 - də tutulublar.
Polis bölməsindən qeyd ediblər ki, dekabrın 18 - də, 4-5 gün əvvəl evində ölmüş Aleksandr Qolekoba şüşə qabla vurularaq qətlə yetirilməsi müəyyən edilib. Polis bölməsindən əlavə ediblər ki, cinayətin açılmasına səbəb mərhumun həyat yoldaşının polisə müraciət edərək evlərinin qapısının bağlı olduğunu deməsi olub. Polis əməkdaşları həmin ünvana gedərək qapını sındırıb evə daxil olanda, Qolekobanın qətlə yetirilmiş meyiti aşkar edilib. Araşdırma zamanı müəyyən olunub ki, hadisə baş verən gün Bazilevski Qolekoba ilə bir yerdə yeyib - içiblər, aralarında yaranan mübahisə zamanı sonuncu küçə söyüşləri ilə Bazilevskini təhqir edib. Mübahisə zamanı Bazilevski şüşə qablarla Qolekobanın başına və bədəninə vuraraq onu yerə yıxıb. Bundan sonra bıçaqla ona bir neçə xəsarət yetirərək öldürüb. Hadisədən sonra qatil bıçağı həyətə tullayıb, qapını qıfıllayıb və hadisə yerini tərk edib. "Bazilevski bununla cinayət izlərini itirmək istəyib ki, Qolekobanın evdə yıxılıb ölməsi ehtimal edilsin. Amma polislərin araşdırması nəticəsində cinayətin üstü açılıb", deyə polis bölməsindən bildiriblər.
Polis bölməsindən əlavə ediblər ki, Bazilevski "bomj"olub. O, Qolekoba ilə tez - tez yeyib içirmişlər.
Məqalə müəllifi ilə əlaqə ünvanı:[email protected]