Azərbaycan, Bakı, 25 dekabr/ Trend , müxbir C.Babayeva/ Azərbaycanın yeni dövlət qeydiyyatına alınmış müxalif Milli - Demokrat Partiyasının siyasi kursunda dəyişiklik gözlənilmir.
"Partiya millətçilik ideyası platformasında fəaliyyətini davam etdirəcək. Fəaliyyətimizin əsas istiqaməti dövlətçilik və millətçilikdir", deyə cümə axşamı Trend -a Milli Demokrat Partiyasının sədri Tufan Kərimli bildirib.
Trend - un arayışı: AMDP 1993 - cü ildə yaradılıb və ilk adı "Boz Qurd" olub. 1994 - cü ildə Ədliyyə Nazirliyində dövlət qeydiyyatına alınıb. 1995 - ci ildə Ali Məhkəmə, partiyanın adının müvafiq olmadığını əsas gətirərək, "Boz Qurd"un dövlət qeydiyyatını ləğv edib. Partiya qeydiyyat problemini həll etmək üçün 1999 - cu ildə keçirdiyi ikinci qurultayında adını dəyişib və Milli Demokrat Partiyası adlandırılıb. Lakin Ədliyyə Nazirliyi partiyanı qeydiyyata almaqdan imtina edib. Partiyanın keçmiş sədri, sabiq daxili işlər naziri İsgəndər Həmidov 1995 -2004- cü illərdə həbsdə olub. 15 il azadlıqdan məhrum edilmiş Həmidov 2004 - cü ildə prezidentin əfv fərmanı ilə azadlığa çıxıb.
Bu ilin aprelində Həmidov partiya sədrliyindən istefa verib. O, istefasını partiyada sədrliyə layiq şəxslərin olması və onlara yol açmaq istəməsi ilə izah edib.
AMDP- nin avqustun 24 - də keçirilmiş nöbvbədəkənar IV qurultayında Böyük Məclis sədri Tufan Kərimli partiyanın sədri seçilib.
Ədliyyə Nazirliyi dünən AMDP-ni dövlət qeydiyyatına alıb.
Kərimlinin sözlərinə görə, partiya həqiqi millətçi partiyalarla əməkdaşlığı davam etdirəcək. "Müəyyən taktiki məsələlərdə digər siyasi qüvvələrlə də əməkdaşlıq mümkündür. Lakin bu əməkdaşlıq bizim prinsiplərimizə xələl gətirməməlidir", deyə o bildirib.
AMDP sədri partiyanın seçkili orqanlarda təmsil olunması istiqamətində işlərin aparıldığını deyib. "Qarşıdakı bələdiyyə və parlament seçkilərində fəal iştirak edəcəyik", - Kərimli bildirib.
O, partiyanın qeydiyyata alınmış partiyalara qanunla verilmiş hüqüqlarını reallaşdırmağa cəhd edəcəyini deyib.
Məqalə müəllifi ilə əlaqə ünvanı: [email protected]
