Dekabrın 31-də referendum
üzrə "Yeni Azərbaycan" təşəbbüs qrupunun
təsis yığıncağı keçirilib.
Azərtac-ın yaydığı xəbərə
görə, Yeni Azərbaycan Partiyası sədrinin
müavini-icra katibi, Milli Məclisin deputatı Əli
Əhmədov bildirib ki, yığıncağın
gündəliyinə 2009-cu il martın 18-də
keçiriləcək referendum üzrə təşviqat
qrupunun yaradılması məqsədi ilə referendum
təşəbbüs qrupunun formalaşdırılması və
adlandırılması, təşəbbüs qrupunun
səlahiyyətli nümayəndələrinin təyin
edilməsi, bu qrupun səlahiyyətli nümayəndələrinə
təşəbbüs qrupu adından notariat qaydasında
təsdiq edilmiş vəkalətnaməni imzalamaq hüququnun
verilməsi, qrupun yaradılması barədə
bildirişlə Mərkəzi Seçki Komissiyasına
müraciət edilməsi məsələləri daxil edilib.
Əli Əhmədov dekabrın 26-da Milli Məclisin
"Azərbaycan Respublikasının Konstitusiyasına
əlavələr və dəyişikliklər
edilməsinə dair ümumxalq səsverməsinin (referendumun)
keçirilməsi haqqında" qərar qəbul etdiyini
xatırladıb. "Azərbaycan Respublikasının Seçki
Məcəlləsinə uyğun olaraq, biz təşviqatla
bağlı təşəbbüs qrupu yaratmalıyıq.
Ölkənin inkişafı qanunvericilikdə zamanın
tələblərinə uyğun dəyişikliklər
olunmasını tələb edir. Konstitusiyaya 2002-ci ilin avqustunda
referendum yolu ilə müəyyən dəyişikliklər
edilib. Hazırda isə 29 maddəyə əlavə və dəyişikliklər
nəzərdə tutulur. Bu dəyişikliklər
cəmiyyət tərəfindən irəli sürülən
təkliflər əsasında formalaşmış və onların
müzakirəyə çıxarılması
təşəbbüsü YAP tərəfindən də
müdafiə edilib. Bu dəyişikliklərin
hərtərəfli şəkildə seçicilərə
çatdırılması və bununla əlaqədar
geniş izahat işi aparılması məqsədi ilə
qanuna uyğun olaraq "Yeni Azərbaycan" təşəbbüs
qrupunun yaradılmasını məqsədəuyğun hesab
edirik" - deyə o bildirib.
Təsis yığıncağında çıxış
edən YAP icra katibinin müavini, Milli Məclisin deputatı Mübariz
Qurbanlı, Milli Məclisin aqrar siyasət daimi
komissiyasının sədri Eldar İbrahimov, YAP idarə
heyətinin üzvləri Zahid Qaralov, Kərim Kərimov və
başqaları müzakirə olunan
məsələlərlə bağlı fikirlərini
bildirmişlər. Çıxışlarda qeyd olunmuşdur
ki, Konstitusiyaya təklif olunan əlavələr və
dəyişikliklər vacibdir, ölkəmizdəki
sosial-iqtisadi tərəqqi bu dəyişiklikləri zəruri
edibdir.
Təsis yığıncağı
iştirakçılarının yekdil qərarı ilə
"Yeni Azərbaycan" təşəbbüs qrupu yaradılıb.
YAP-ın sədr müavini Əli Əhmədov, partiyanın
icra katibinin müavinləri Siyavuş Novruzov və Mübariz
Qurbanlı təşəbbüs qrupunun səlahiyyətli
nümayəndələri seçiliblər.
Sonda "Yeni Azərbaycan" təşəbbüs qrupunun
yaradılması barədə bildirişlə Mərkəzi
Seçki Komissiyasına müraciət edilməsi barədə
qərar qəbul olunub.