Azərbaycan, Bakı, 13 yanvar / Trend , müxbir B.Həsənov/ TÜRKSOY Dağlıq Qarabağdakı türk mədəniyyət irsinin dunyaya tanıdılması üçün, həmin ərazilərdəki tarixi və mədəni abidələrin siyahısını hazırlayır, - çərşənbə axşamı Ankaradan telefonla Trend -a təşkilatın direktor müavini Fırat Purtaş deyib.
"Biz Qarabağdakı türk mədəniyyəti abidələrini YUNESKO-nun elan etdiyi dünya mədəniyyət irsi siyahısına daxil etmək istiqamətində səylər göstərəcəyik", - Purtaş bildirib.
Trend - un arayışı: Azərbaycan tərəfi ölkənin Ermənistan tərəfindən işğal olunmuş ərazilərində mədəni-tarixi abidələrin məhv edilməsilə bağlı araşdırmaların aparılması üçün beynəlxalq təşkilatlara, o cümlədən Avropa Şurasına müraciət edib.
Azərbaycanın işğal edilmiş ərazisində 689 abidə var ki, onlardan 13-ü (6 memarlıq və 7 arxeoloji) dünya səviyyəsində, 242-si (117 memarlıq və 7 arxeoloji) dövlət səviyyəsində və 434-ü (373 memarlıq və 23 arxeoloji abidə, 21 bağ, parklar, əzəmətli abidələr, 17 tətbiqi incəsənət əsəri) yerli səviyyədə böyük əhəmiyyət kəsb edir.
Ermənistan Azərbaycan ərazisinin 20 faizini - Dağlıq Qarabağı və ətrafındakı yeddi rayonu işğal edib. İşğal 1988-ci ildən başlayıb, 1991-ci ilin dekabrınadək, Şuşa və Xocalı istisna olmaqla, Dağlıq Qarabağ Azərbaycanın nəzarətindən çıxıb. 1992 - 1993-cü illərdə isə, Şuşa, Xocalı və Dağlıq Qarabağın ətrafındakı daha yeddi rayon işğal edilib. 1994 - cü ildə Ermənistanla Azərbaycan arasında atəşkəs haqqında razılıq əldə olunub və indiyədək də tərəflər arasında sülh danışıqları davam etdirilir.
Purtaş hazırda TÜRKSOY-un nəzdindəki Maddi Mədəni İrsin Qorunması Mərkəzinin Qarabağdakı maddi mədəniyyət əsərlərinin siyahısının tərtib etdiyini bildirib. Onun sözlərinə görə, siyahı tərtib edildikdən sonra, ilkin mərhələdə sözügedən mədəniyyət abidələrinin nəşr edilərək dünya ictimaiyyətinə tanıdılmasına səy göstəriləcək.
Yanvarın 16-17-də TÜRKSOY - un 15 illik yubileyi münasibəti ilə Türkiyədə bir sıra mədəni tədbirlər keçirilməsi nəzərdə tutulur.
Purtaş, mədəni tədbirlərlə yanaşı, üzv ölkələrin Mədəniyyət Nazirləri Daimi Şurasının növbədənkənar iclasının keçirilməsini də planlaşdırdıqlarını bildirib.
Baş ofisi Ankarada yerləşən TÜRKSOY (Türk Kültür və Sənətləri Ortak Yönətimi) 1993-cü ildə Azərbaycan, Qazağıstan, Özbəkistan, Türkiyə və Türkmənistan tərəfindən yaradılmış beynəlxalq təşkilatdır. Təşkilatın əsas məqsədi türk xalqlarının ortaq maddi və mənəvi abidələrini qorumaq, inkişaf etdirmək və gələcək nəsillərə ötürmək istiqamətində türkdilli xalqlar arasında əməkdaşlıq etməkdir.Təşkilat eyni zamanda, YUNESKO da daxil olmaqla, bir sıra nüfuzlu beynəlxalq təşkilatlarla da əməkdaşlıq edir. TÜRKSOY-un ən yüksək orqanı üzv ölkələrin Mədəniyyət Nazirləri Daimi Şurasıdır.
