Azərbaycan, Bakı, 15 yanvar / Trend , müxbir K.Zərbalıyeva/ Ötən il Bakının Xətai rayonundakı "Diaqnoz" Tibb Mərkəzində əməliyyat zamanı xəstənin ölümündə həkimin məsuliyyət məsələsi ekspertizanın rəyindən sonra bəlli olacaq.
Baş Prokurorluğun mətbuat xidmətindən cümə axşamı Trend -a bildirib ki, faktla bağlı Xətai rayon Prokurorluğunda araşdırma aparılır. Ölümün səbəbini müəyyənlşdirmək üçün məhkəmə tibb ekspertizası təyin olunub.
Səhiyyə Nazirliyinin Məhkəmə Tibb Ekspertizası Birliyinin verəcəyi rəydən asılı olaraq bu məsələyə hüquqi qiymət veriləcək.
Trend -un arayışı: Ötən il noyabrın 8-də "Diaqnoz" Tibb Mərkəzində burun çəpərinin əyriliyi üzündən əməliyyata gətirilən 31 yaşlı Ruslan Həmidov adlı xəstə əməliyyat zamanı dünyasını dəyişib. Həkim İlqar Əzimov mili nəfəs borusundan xəstənin burnuna daxil etmək istəyərkən aorta damarına toxunub. Aorta damarında başlayan qanaxma nəticəsində Həmidov cərrahiyyə stolunda dünyasını dəyişib.
Həmidovun yaxınları bunun sadə əməliyyat olduğunu bildirir, faciənin həkimin səriştəsizliyi və səhlənkarlığı ucbatından baş verdiyini iddia edib və həkimin məsuliyyətə cəlb olunması üçün Xətai rayon Prokurorluğuna müraciət edib.
İlkin tibbi ekspert xəstənin qan itirmədən dünyasını dəyişdiyini bildirib.
Hadisədən sonra Səhiyyə Nazirliyinin mətbuat xidmətinin mətbuata verdiyi açıqlamada bildirilib ki, xəstədə septoplastik-burun ara kəsiyinin plastik əməliyyatı aparılıb. Əməliyyatdan əvvəl Həmidov bütün zəruri analizlərdən keçirilib. Həmidov narkozdan normal vəziyyətdə ayılıb və qohumları ilə söhbət edib. Əməliyyatdan 7 saat sonra isə xəstə qəfildən qan qusmağa başlayıb. Ona tibbi yardım edilsə də, qanaxmanı dayandırmaq mümkün olmayıb və xəstə bu səbəbdən keçinib.
Məqalə müəllifi ilə əlaqə ünvanı:[email protected]
