Azərbaycan, Bakı, 09 fevral / Trend , müxbir A.Hüseynbala/ Azərbaycanın müxalifət partiyası Kollektiv Təhlükəsizlik Müqaviləsi Təşkilatının (KTMT) Çevik Qüvvələr Kontingentinin yaradılmasına etirazını bildirib.
"Rusiya postsovet məkanında hakim mövqeyini yenidən bərpa etməyə cəhdlər göstərməkdə davam edir", - bazar ertəsi Müsavat Pariyasının Trend -a daxil olan bəyanatında bildirilir.
Trend -un arayışı: Moskvada ötən həftə KTMT-nin iştirakçı dövlətlərinin Xarici İşlər Nazirləri Şurasının müdafiə nazirləri Şurası və təşkilatın Təhlükəsizlik Şuralarının katibləri Komitəsinin iştirakı ilə iclası keçirilib. İclasın əsas müzakirə mövzusu operativ reaksiyalı birgə kollektiv hərbi qüvvələrinin yaradılması olub və bununla bağlı saziş imzalanıb.
Kollektiv Təhlükəsizlik Müqaviləsi Təşkilatı (KTMT) yeddi dövlət - Rusiya, Ermənistan, Belarus, Qazaxıstan, Qırğızıstan, Tacikistan və Özbəkistanın hərbi-siyasi birliyidir. Təşkilat 1992-ci il mayın 15-də imzalanmış Kollektiv Təhlükəsizlik Müqaviləsi əsasında yaradılıb. 2002-ci il mayın 14-də Kollektiv Təhlükəsizlik Müqaviləsi beynəlxalq təşkilata çevrilib. 2004-cü ilin dekabrın 2-də KTMT-yə BMT-nin Baş Assambleyasında müşahidəçi statusu verilib. Azərbaycan təşkilata üzv deyil.
Azərbaycan Prezidentinin İcra Aparatının beynəlxalq əlaqələr şöbəsinin müdiri Novruz Məmmədov ötən həftə Trend -a deyib ki, Kollektiv Təhlükəsizlik Müqaviləsi Təşkilatına (KTMT) üzv olan ölkələr tərəfindən vahid hərbi kontingentin yaradılması Azərbaycanın təhlükəsizliyinə təsir etməyəcək.
Müsavatın bəyanatında qeyd edilir ki, bu günlərdə MDB-nin KTMT nəzdində Çevik Qüvvələr Kontingentinin yaradılması haqqında qərar qəbul edilməsi bunu bir daha təsdiq edir. "Ölkə daxilində iqtisadi böhranın durmadan dərinləşməsinə baxmayaraq, Rusiyanın bütün xərcləri öz üzərinə götürərək belə bir hərbi birliyi yaratmaq cəhdi bir daha göstərir ki, bu ölkə regional güc statusu ilə barışmayaraq yenidən fövqəlgücə çevrilmək iddiasına düşüb. Azərbaycan üçün Rusiyanın bu addımları kifayət qədər təhlükəli vəziyyət yaradır", - sənəddə vurğulanır.
Müxalif partiya hesab edir ki, çevik qüvvələrin yaradılacağı təqdirdə onun bir hissəsinin Ermənistanda yerləşdirilməsi təhlükəsi var. "Belə olan şəraitdə Ermənistanı təpədən-dırnağa qədər slahlandıran Rusiyanın Azərbaycan üçün sürprizlər hazırladığını görməmək mümkün deyil", - bəyanatda bildirilir.
Sənəddə qeyd edilir ki, indiki şəraitdə Azərbaycanın ən önəmli addımlarında biri NATO-ya üzvlük haqqında müraciəti ola bilər. "Bu kontekstdə ABŞ-la strateji əməkdaşlıq əlaqələrinin daha da genişləndirilməsinə böyük ehtiyac duyulur. Azərbaycanın Avroatlantik məkana birmənalı inteqrasiya xətti yeritməsi də bu baxımdan böyük səmərə verə bilər", - müxalif partiya belə düşünür.
Müsavat Partiyası 1911-ci ilin oktyabrında Bakıda yaradılıb. Müsavat Partiyasının (Bərpa) Qurultayı 1992-ci il noyabrın 7-də Bakıda Respublika sarayında keçirilib. Gizli səsvermənin yekunları əsasında İsa Qəmbər əksəriyyət səslə Müsavat Partiyasının başqanı seçilib.
Qəmbər Аzərbаycan pаrlаmеntinin еks-spikеri (1992-93-cü illərdə) və 2003-cü ildə keçirilmiş prezident seçkisində prezidentliyə namizəd olub. Pаrtiyа 4 nəfər deputatla parlamentdə təmsil olunur.
Məqalə müəllifi ilə əlaqə ünvanı: [email protected]
...
