Azərbaycan, Bakı, 10 aprel / Trend , müxbir C.Babayeva /
Azərbaycanın Solçu Qüvvələr Birliyinə yeni siyasi təşkilatların birləşməsi ilə əlaqədar qurumun əsasnaməsi yenidən işlənib.
"Azərbaycan Yaşıllar Partiyası, Yeni Nəsil Kommunist Partiyası və Solyönümlü Alimlər Qrupu Birlikdə təmsil olunmağa razılıq veriblər. Yeni əsasnamə razılaşdırılması üçün bu qurumlara təqdim olunub. Solçu Qüvvələr Birliyinin aprel ayı ərzində rəsmən təsis olunması nəzərdə tutulur", - cümə günü Trend -a Marksizm-Leninizm platformasında Azərbaycan Kommunist Partiyasının sədri Telman Nurullayev bildirib.
Trend -un arayışı: Ötən ilin sonunda Azərbaycan Sosialist, Kommunist, Vahid Kommunist partiyaları və Marksizm-Leninizm platformasında Azərbaycan Kommunist Partiyasının sədrləri solçu qüvvələrin birliyinin yaradılması ilə bağlı razılığa gəliblər. Birliyin yaradılmasında məqsəd solçu partiyaları vahid ideologiya ətrafında birləşdirmək, bələdiyyə və parlament seçkilərində vahid platformadan çıxış etmək olub. Azərbaycan Kommunist Partiyasının sədri Rauf Qurbanov sonradan Birlikdə təmsil olunmaqdan imtina edib. O, Birlikdə təmsil olunmanın partiyanın sərbəst fəaliyyətini məhdudlaşdıracağını bildirib.
Nurullayev bildirib ki, əsasnaməyə əsasən Birlikdə siyasi partiyalarla yanaşı, qeyri-hökumət təşkilatları və digər birliklər də təmsil olunacaq. "Birlikdə təmsil olunan partiyalar qurumun əhatə dairəsinin geniş olmasının tərəfdarlarıdır. Solçu Qüvvələr Birliyi real qüvvə kimi siyasi müstəviyə çıxmaq niyyətindədir", - partiya sədri deyib.
Məqalə müəllifi ilə əlaqə ünvanı: [email protected]