Azərbaycan, Bаkı, 05 may / Trend , müxbir A.Hüseynbala /
Azərbaycan müxalifətinin yeni yaranacaq koalisiyasına referendum ərəfəsi təsis edilən hərəkatda təmsil olunan partiyaların bir neçəsi qoşulmaya bilər.
"Amma bizim əsas məqsədimiz həmin hərəkatın bazasında müxalifətin geniş tərkibdə birləşməsidir", - çərşənbə axşamı Trend -a "Qarabağ və Respublika Uğrunda Hərəkat"da təmsil olunan Müsavat Partiyası Mərkəzi İcra Aparatının rəhbəri Arif Hacılı bildirib.
Trend -un arayışı: Müsavat Partiyası Məclisinin ötən həftənin sonunda keçirilən iclasında real müxalifət partiyalarının "Qarabağ və Respublika Uğrunda Hərəkat" çərçivəsində geniş koalisiyasının yaradılması istqamətində səylərin artırılması haqda qərar çıxarılıb. Bundan əvvəl də bir neçə dəfə müxalifətin bələdiyyə seçkiləri ilə bağlı daha geniş tərkibdə əməkdaşlıq etməsi gündəmə gətirilib.
Hacılının sözlərinə görə, Müsavat Pariyası hərəkatda təmsil olunmayan partiyalarla ayrıca koalisiya yaratmaq niyyətində deyil. "Biz geniş koalisiya dedikdə bütün müxalif qüvvələrin razılığı ilə yaradılacaq qurumu nəzərdə tuturuq", - partiya funksioneri əlavə edib.
"Bizim hərəkata bundan sonra hansısa partiyanın qoşulması mümkün deyil", - çərşənbə axşamı Trend -a "Qarabağ və Respublika Uğrunda Hərəkat"da təmsil olunan Azərbaycan Liberal Partiyasının (ALP) sədr əvəzi Əvəz Temirxan bildirib.
Onun sözlərinə görə, hərəkat təsis olunanda Demokratiya Uğrunda İttifaqda (DUİ) təmsil olunan partiyalara dəfələrlə dəvət göndərilsə də, quruma qoşulmaqdan imtina ediblər. " DUİ və AMİP referendumla bağlı təşviqat kampaniyası zamanı efir vaxtının bölünməsi təklifini qəbul etmədilər, onlar birgə aksiyalar, təbliğat aparmaq, birgə müşahidə missiyası keçirilməsindən imtina etdilər", - ALP-nin sədr əvəzi əlavə edib.
Temirxan deyib ki, hərəkata hansısa partiyanın daxil olması məsələsi konsensus yolu ilə həll olunmalıdır. "Bir neçə dəfə məsələ müzakirə olunub və DUİ-dəki partiyalarla, eləcə də AMİP-lə birgə fəaliyyət göstərmək üçün razılıq verilməyib", - partiya funksioneri qeyd edib.
Onun fikrincə, DUİ-dən kənarda müxalif partiya olmadığından hərəkata başqa siyasi qüvvənin qoşulacağı inandırıcı görünmür. "Müsavat Partiyasının Məclisində qəbul olunan qərar normaldır. Ancaq heç bir partiyanı hərəkata üzv qəbul etmək olmaz. Müxalifətin birləşmək zərurətini DUİ-də təmsil olunan partiyalar gec başa düşüblər", - Temirxan bildirib.
"Qarabağ və Respublika Uğrunda Hərəkat"ı Azərbaycan Xalq Cəbhəsi, Vətəndaş və İnkişaf, Liberal, Demokrat, Müsavat və Ümid partiyaları, eləcə də bir neçə ictimai təşkilat təsis edib.
Dеmоkrаtiyа Uğrunda İttifаqı 2005-ci il parlamеnt seçkisindən sonra müxalifətçi Klassık Xalq Cəbhəsi, Azadlıq və Milli Demokratiya partiyaları yаrаdıb. 2008-ci il sеntyаbrın əvvəllərində Böyük Azərbаycаn, nоyаbr аyındа isə Хаlq pаrtiyаlаrı DUİ-yə üzv qəbul оlunub. İttifаq bu pаrtiyaların məşvərət və əməkdaşlıq qurumudur.
Məqalə müəllifi ilə əlaqə ünvanı:[email protected]
