Azərbaycan, Bakı, 07 may / Trend , müxbir E.İsmayılov /
Azərbaycan Maliyyə Nazirliyi Bakı metropoliteninin üç yeni stansiyasının -
"Cavad xan" ("Memar Əcəmi" stansiyasından keçid), "Avtovağzal" və "Mikayl Müşfiq" stansiyalarının tikintisinə vəsait ayırıb. Bu barədə cümə axşamı Bakı metropoliteninin rəhbəri Tağı Əhmədov bildirib. Lakin o, bu stansiyaların tikintisinə ayrılan vəsaitin məbləğini açıqlamayıb.
Hazırda yeni stansiyaların layihələndirilməsi, həmçinin bunun üçün lazım olan geoloji işlər aparılır.
"Cavad xan"-"Avtovağzal" (yeni avtovağzalın yanı) istiqaməti ilk prioritet xətdir. Bu stansiyalar üçün sahənin ayrılmasına dair müvafiq icra orqanlarından artıq icazə alınıb.
"Mikayıl Müşfiq" stansiyasının ilkin layihəsi hələ 1990-cı illərdə hazırlanıb, onun "İnqilab" adlandırılması nəzərdə tutulurdu. Məlumatlı mənbənin əvvəllər bildirdiyinə görə, stansiyanın yerləşdiyi yerin 400-500 metr dəyişdiriləcəyi planlaşdırılır. Yeni metro stansiyası 7-ci mikrorayon ərazisində tikiləcək.
İkinci prioritet xətt "İçəri Şəhər" stansiyasından Bakının Badamdar qəsəbəsi istiqamətində ikinci yolun açılmasıdır. Bu istiqamətdə üç metro stansiyasının tikintisi planlaşdırılır. Mənbənin əvvəllər bildirdiyinə görə, işlərə yalnız 2011-2012-ci illərdən sonra başlamaq planlaşdırılır.
Bakı metropoliteni "İçəri Şəhər" stansiyasından "Nəriman Nərimanov" stansiyasınadək üç aralıq stansiya ilə 1967-ci ildən fəaliyyət göstərir. Metropolitenin yeddi stansiyası (İçəri Şəhər, Sahil, 28 may, Cəfər Cabbarlı, Xətai, Nizami, Elmlər Akademiyası) dərin enişli, "Bakmil" yerüstü, qalanları isə sütunlu, dayaz enişlidir (cəmi 21 stansiya).
Məqalə müəllifi ilə əlaqə ünvanı: [email protected]
