...

İran Xəzər dənizində Azərbaycanla sərhəddə yeni liman tikəcək

Siyasət Materials 7 May 2009 17:34 (UTC +04:00)

Azərbaycan, Bakı, 07 may / Trend , müxbir Т.Cəfərov /

İran Gəmiçilik İdarəsi və KAVEH İran şirkəti Astara şəhərində (Azərbaycanla sərhəddə) Xəzər dənizində yeni limanın tikintisi üzrə müqavilə imzalayıblar. Müqavilənin müddəti 40 ildir. "Limanın tikintisi 5-6 il çəkəcək", - cümə axşamı Trend -a telefonla Astara limanının direktoru (KAVEH nümayəndəsi) Abbas Nasehi deyib.

"Hazırda Astarada balıqçılıq limanı yerləşir. KAVEH şirkəti bu limanı ticarət limanına çevirmək məqsədilə 40 il müddətinə icarəyə götürüb", - Nasehi deyib.

Onun sözlərinə görə, limanın tikintisinə 30 milyon dollara yaxın sərmayə qoyulacaq.

"Limanda onun müdafiəsi üçün 30 metrlik beton dalğaqıran, dörd yanalma körpüsü tikiləcək ", - Nasehi bildirib.

Liman direktorunun sözlərinə görə, üç yanalma körpüsü malların, biri isə neft və neft məhsullarının boşaldılıb-yüklənməsi üçün istifadə olunacaq. Limanın gücü ildə 3,5 milyon ton yük təşkil edəcək.

"Gücün ümumi həcmindən 2 milyon tonu neft və neft məhsullarının, 1,5 milyon tonu isə quru yüklərin payına düşəcək", - Nasehi deyib. Limanın ümumi ərazisi 55 hektar olacaq. Liman ərazisində üç rezervuar tikiləcək və dibi 5,5 metr dərinləşdiriləcək.

Limandakı tikinti və bərpa işlərinə "Sazepardazi" İran məşvərətçi şirkəti cəlb edilib. O, limanın tikintisinə nəzarət edəcək. 

"Gələn həftə KAVEH və "Sazepardazi" arasında limanın tikintisi barədə müqavilə imzalanacaq", - Nasehi qeyd edib.

O, əlavə edib ki, tikinti yaxın iki ay ərzində başlayacaq. Tikintinin ilk mərhələsinin gələn ilin birinci yarısında başa çatdırılması gözlənilir. 

"Limanın tikintisi iki mərhələdə aparılacaq. Birinci mərhələ çərçivəsində bir yanalma körpüsü hazırlanacaq və dibin dərinləşdirilməsi aparılacaq. Digər üç yanalma körpüsünün tikintisi və başqa çalışmalar üç il davam edəcək ikinci mərhələ çərçivəsində həyata keçiriləcək", - Nasehi deyib.

Hazırda İranın Xəzər dənizində üç limanı var: Ənzəli, Nouşehr və Əmirabad (Neka limanı ilə birləşdirilib).

Əmirabad limanı İranın Mazandaran vilayətinin şərqində Behşehr şəhərində yerləşir və 1997-ci ildən etibarən azad iqtisadi zonadır. Limanın tikintisi 1996-cı ildə başlayıb. Limanın ərazisi 1000 hektardır və 2000 hektara qədər artırıla bilər. Bu limanın tikintisinin son mərhələsinin başa çatmasından sonra onda 34 yanalma körpüsü olacaq. Hazırda liman 5 milyon tona yaxın yük qəbul edə bilər. Gələcəkdə bu rəqəm 10 milyon tona qədər artırılacaq. Bu liman Şimal-Cənub marşrutu üzrə yüklərin nəqli çərçivəsində İran üçün böyük əhəmiyyət daşıyır.

Ənzəli limanı İranın Gilan vilayətində yerləşir. 34 hektar ərazisi var. Limanda 10 yanalma körpüsünün tikintisi nəzərdə tutulub. Daha üç yanalma körpüsü neft və neft məhsulları üçün tikiləcək. 2002-ci ildən etibarən bu liman azad iqtisadi zonadır. Liman digər Xəzəryanı dövlərlərin limanlarına ən yaxınıdır. O da həmçinin, Şimal-Cənub marşrutu üzrə yüklərin nəqlində istifadə olunur. 

Nouşehr limanının tikintisi 1930-cu ildə başlayıb və 1939-cu ildə sona çatıb. Bu liman da İranın Mazandaran vilayətində yerləşir. Limanda neft məhsulları üçün dörd, quru yüklər üçün bir yanalma körpüsü var. Limanın gücü ildə 5,1 milyon ton maye və eyni həcmdə quru yüklərin doldurub-boşaldılması qədərdir.

Məqalə müəllifi ilə əlaqə ünvanı: [email protected]

Xəbər lenti

Xəbər lenti