Azərbaycan, Bakı, 13 may / Trend , müxbir C.Babayeva /
Azərbaycanın müxalif Azadlıq Partiyası hesab edir ki, "Qarabağ Forumu" müxalifətin bir araya gəlməsinə ciddi töhfə verməyəcək.
"Qarabağ Forumu"nun müxalifəti bir araya gətirəcəyi az gözləniləndir. Müxalifətin müəyyən hissəsi forumda iştirak etməyəcəklərini bildiriblər", - çərşənbə günü Trend -a Forumun təşkilatçısı olan Demokratiya Uğrunda İttifaqda (DUİ) təmsil olunan Azadlıq Partiyasının sədri Əhməd Oruc bildirib.
Trend -un arayışı: DUİ Dağlıq Qarabağ münaqişəsinin nizamlanması ilə bağlı yaranan indiki situasiyanın müzakirəsi üçün mayın 14-də "Qarabağ Forumu" keçirəcək. DUİ-də Klassik Xalq Cəbhəsi, Milli-Demokrat, Azadlıq, Böyük Azərbaycan, Xalq partiyaları təmsil olunur.
"Qarabağ və Respublika Uğrunda Hərəkat"da təmsil olunan Azərbaycan Xalq Cəbhəsi, Vətəndaş və İnkişaf, Liberal, Demokrat, Müsavat və Ümid partiyaları və bir neçə ictimai təşkilat "Qarabağ Forumu"nda iştirak etməyəcəklərini bildiriblər.
Orucun sözlərinə görə, "Qarabağ Forumu"nda iştirak etməkdən imtina etmiş müxalifət partiyaları Qərbin Azərbaycanda müxalifət kimi tanıdığı dairələrdir. "Onlar forumda iştirak etməməklə sahiblərinin göstərişini yerinə yetirilər", - partiya sədri deyib.
O bildirib ki, "Qarabağ Forumu"nun keçirilməsi təşəbbüsü Azərbaycanın milli problemləri ətrafında müxalif siyasi qüvvələrin bir araya gəlməsinə bir cəhd olub. "Cəhdin reallaşmamasının günahı Forum təşkilatçılarının üzərinə düşmür", - partiya sədri deyib.
Oruc deyib ki, Forum əvvəlki forumlardan fərqlənməyəcək. "Forumda Dağlıq Qarabağla bağlı hakimiyyətin siyasətinin təhlili aparılacaq və təkliflər irəli sürüləcək. Sonda müraciətin qəbul olunacağı gözlənilir", - Oruc bildirib.
Məqalə müəllifi ilə əlaqə ünvanı: [email protected]
