Azərbaycan, Bakı, 29 iyun / Trend , müxbir A.Hüseynbala /
Azərbaycanın müxalif partiyası sədrinin və müavinlərinin vəzifələrindən uzaqlaşdırılması radikal siyasət tərəfdarı olmamaları ilə bağlıdır.
"Partiyada iki qruplaşma yaranmışdı, onların bir hissəsi hakimiyyətə qarşı daha radikal siyasət aparılmasının tərəfdarı idi", - bazar ertəsi Trend -a Açıq Cəmiyyət Partiyası (ACP) sədrinin keçmiş müavini Yaqub Abbasov bildirib.
Trend -un arayışı: Açıq Cəmiyyət Partiyası İdarə Heyətinin ötən həftə keçirilən iclasında Akif Şahbazov sədr vəzifəsindən istefa verib. Onun səlahiyyətləri Ali Məclisin sədri Vaqif Mahmudova həvalə olunub. AÇP-nin yeni sədri Ali Məclisin növbəti iclasında seçiləcək.
Ötən şənbə günü partiya sədrinin müavinləri Yaqub Abbasov və Fərəməz Cavadov vəzifələrindən uzaqlaşdırılıblar.
Abbasovun sözlərinə görə, onun da daxil olduğu qruplaşma isə daha loyal siyasətin aparılmasını istəyir. "Mən yenə düşünürəm ki, Azərbaycanda hakimiyyətə qarşı radikal siyasət aparmaqla heç bir uğur qazanmaq mümkün deyil", - keçmiş müavin əlavə edib.
Müavin vəzifəsindən çıxarılmasına gəldikdə, İdarə Heyətinin üzvü deyib ki, bu, partiyanın ABŞ-da mühacirətdə olan lideri Rəsul Quliyevin tövsiyəsi ilə olub və qərara hörmətlə yanaşır. "Partiya üzvlüyümdən gedəcəyim haqda hələ ki qəti qərarım yoxdur. Ali Məclisin növbəti iclasında sədr seçiləndən sonra bununla bağlı qərarımı açıqlayacağam", - Abbasov bildirib.
Sağ mərkəzçi, müxalifətyönlü ACP 2007-ci ilin aprelində təsis olunub. Partiyanın lideri Azərbaycanın eks-spikeri, hazırda mühacirətdə yaşayan Rəsul Quliyevdir. 2007-ci ilin fevralınadək ADP-nin sədri olmuş Quliyev və onun tərəfdarlari etiraz olaraq ADP-dən imtina edərək özlərinin Açıq Cəmiyyət Partiyasını yaradıblar.
Məqalə müəllifi ilə əlaqə ünvanı: [email protected]