Azərbaycan, Bakı, 20 avqust / Trend , müxbir C.Babayeva /
Azərbaycanın müxalifət partiyaları Dağlıq Qarabağ problemi ilə bağlı fəaliyyətlərini əlaqələndirmək üçün mərkəzin yaradılmasını müzakirə edirlər.
"Siyasi qüvvələrin Dağlıq Qarabağ problemi ilə bağlı fəaliyyətlərinin əlaqələndirilməsinə ehtiyac var. Müxalifət partiyaları Dağlıq Qarabağ və milli maraqlar çərçivəsində səmimi şəkildə mübarizə aparan siyasi qüvvələrin fəaliyyətinin əlaqələndirilməsini zəruri hesab edirlər. Mərkəzin yaradılması ilə bağlı təklif var və hazırda müzakirə olunur", - cümə axşamı Trend -a Azadlıq Partiyasının sədri Əhməd Oruc bildirib.
Trend -un arayışı: İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik 7 rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
Orucun sözlərinə görə, Demokratiya Uğrunda İttifaqın işçi qrupu ölkənin ictimai-siyasi proseslərində fəal mövqe tutan siyasi partiyalarla görüşlər keçirib. "Demək olar ki, partiyaların hamısı Dağlıq Qarabağ münaqişəsinin Madrid prinsipləri çərçivəsində həllinin milli maraqlara zidd olduğu fikrindədir. Bütün partiyalar bununla bağlı etirazın bildirilməsini vacib hesab edirlər", - partiya sədri deyib.
Məqalə müəllifi ilə əlaqə ünvanı: [email protected]