Azərbaycan, Bakı, 28 avqust / Trend , müxbir A.Hüseynbala /
Azərbaycanın bir qrup müxalifət partiyasının təmsil olunduğu hərəkatın bələdiyyə seçkilərində blok şəklində iştirakı bir həftə ərzində məlum olacaq.
"Bizim seçkidə vahid namizədlərlə iştirakımız seçki qanunvericiliyində nəzərdə tutulan bəzi tələblərin Mərkəzi Seçki Komissiyası tərəfindən sadələşdirilməsindən asılıdır", - cümə günü Trend -a "Qarabağ və Respublika Uğrunda Hərəkat"da təmsil olunan Azərbaycan Demokrat Partiyasının (ADP) sədri Sərdar Cəlaloğlu bildirib.
Trend -un arayışı: Azərbaycanda bələdiyyə seçkisi bu il dekabrın ortalarında keçirilməsi gözlənilir. Bundan əvvəl iki dəfə - 1999 və 2004-cü illərdə yerli özünüidarəetmə orqanlarına seçkilər keçirilib.
Qəbul edilən qanuna görə, Azərbaycanda bələdiyyələrin sayı 2757-dən 1766-ya enib.
Cəlaloğlunun sözlərinə görə, hərəkat üzvü olan partiyaların seçkilərdə ümumi siyahı ilə iştirakına mane olan əssas məsələ hər bir namizədlə bağlı MSK-ya müvafiq sənədlərin təqdim olunması ilə bağlıdır.
"Buna isə külli miqdarda maliyyə vəsaiti lazımdır. Əgər MSK qaydalarda müəyyən güzəştlərə gedərsə, hərəkatdakı partiyaların namizədlərinin vahid siyahısını müəyyənləşdirib, müvafiq sənədləri təqdim etməklə MSK-da blok kimi qeydiyyatdan keçə bilərik", - partiya sədri əlavə edib.
ADP sədri deyib ki, problemin həlli üçün hərəkatda təmsil olunan Ümid Partiyasının MSK-dakı nümayəndəsinə xüsusi tapşırıq verilib. "Həmin nümayəndəyə MSK-nın rəhbərliyindən istəyimizin müsbət həll olunacağına şifahi çəkildə vəd verilib. Ancaq biz istəyirik ki, bu qərar rəsmi imza ilə təsdiqlənsin. Əgər həmin vəd reallaşarsa, hərəkatın bələdiyyi seçkilərində vahid siyahı ilə iştirakında problem yaranmayacaq", - Cəlaloğlu vurğulayıb.
"Qarabağ və Respublika Uğrunda Hərəkat"ı 2009-cu il martın 18-də Azərbaycan Konstitusiyasına təklif olunan əlavə və dəıyişikliklərlə bağlı keçirilən referendum ərəfəsi Azərbaycan Xalq Cəbhəsi, Vətəndaş və İnkişaf, Liberal, Demokrat, Müsavat və Ümid partiyaları, eləcə də bir neçə ictimai təşkilat təsis edib.
Məqalə müəllifi ilə əlaqə ünvanı: [email protected]
